Журналіст і праваабаронца Аляксандр Буракоў атрымаў вельмі дзіўны адказ пракурора горада Лянчэўскага на сваю скаргу аб персанальным палітычным пераследзе.
7 ліпеня. Магілёў. Саша Мінько
Аляксандр Буракоў 11 чэрвеня пісьмова заявіў у пракуратуру горада заяву аб незаконным палітычным пераследзе службовымі асобамі Ленінскага РАУС г.Магілёў і суддзёй Вікторыяй Паляковай. Дакумент быў афіцыйна зарэгістраваны ў канцылярыі пракуратуры горада, пра што ёсць зацвярджальны штамп.
У скарзе праваабаронца запатрабаваў заклікаць да адказнасці міліцыянтаў, якія займаюцца, як ён даказваў, палітычным пераследам, якое забаронена законам. Былі пералічаныя імёны і прозвішчы службовых асоб Ленінскага РАУС – маёры Павел Башарымаў, Уладзімір Паўлаў і Аляксандр Ячмянёў.
Аўтар скаргі нават пазначыў канкрэтныя артыкулы Крымінальнага кодэкса, якія былі парушаныя: ст.179 КК «Незаконныя збіранне альбо распаўсюджванне інфармацыі аб прыватным жыцці», арт. 190 «Парушэнне раўнапраўя грамадзян», ст.197 «Пераслед грамадзян за крытыку» і, нарэшце, ст.198 КК «Перашкаджэнне законнай прафесійнай дзейнасці журналіста».
У адказ прыйшоў вельмі дзіўны ліст пракурора горада Магілёва, старэйшага дарадцы юстыцыі Дзмітрыя Лянчэўскага.
Нягледзячы на тое, што на самой заяве атрыманай ад Буракова стаіць штамп пракуратуры, пракурор раптам піша, што атрымаў яго з іншай крыніцы (цытата): «у пракуратуру г.Магілёў з суда Ленінскага раёна паступіла Ваша заява аб прыцягненні суддзі да юрыдычнай адказнасці. Па сваёй сутнасці заява з’яўляецца скаргай на дзеянні і рашэнні суддзі».
Каб не быць галаслоўнымі, мы вырашылі апублікаваць фотакопію такога дакумента:
Аляксандр Буракоў у каментары для MSPRING.ONLINE адзначыў, што нават спачатку не зразумеў сэнсу напісанага пракурорам горада.
– Ні ў які суд я ніколі такіх заяў не пісаў. І па сутнасці мая заява з’яўляецца патрабаваннем распачаць крымінальную справу якраз спярша супраць супрацоўнікаў міліцыі, а потым ужо даць ацэнку дзеянням суддзі. Маё ацэначнае меркаванне – пракурор горада напісаў проста ахінею, каб хоць чымсьці прыкрыцца і нават не думаць пра тое, што службовыя асобы могуць быць калісьці прыцягнуты да адказнасці па такіх «экзатычным» палітычных артыкулах, якія я пазначыў, – кажа Аляксандр Буракоў.
Далей пракурор горада майстэрскі распісаў ўвесь механізм абскарджання адміністрацыйных спраў. І шмат слоў напісаў пра тое, што скаргі на пастановы па справах аб адміністрацыйных правапарушэннях разглядаюцца толькі пасля аплаты дзяржпошліны. Асобна ён указаў і куды плаціць 1 базавую велічыню.
Пры гэтым ён ні разу не згадаў пра супрацоўнікаў міліцыі, на якіх і скардзіўся пацярпелы ад іх дзейнасці журналіст і праваабаронца. Тым больш, ні слова не было напісана пра палітычны пераслед.
Дзмітрый Лянчэўскі. Фота – mogilevnews.by
Нагадаем, Аляксандр Буракоў быў затрыманы 8 траўня каля будынку суду Кастрычніцкага раёну, куды прыйшоў назіраць за працэсам над калегамі-журналістамі. Арыштоўвалі яго адразу пяць чалавек – імі кіраваў намесьнік начальніка аддзела правапарадку міліцыі грамадскай бяспекі маёр Павел Башарымаў. Маёр Аляксандр Ячмянёў ў Ленінскім РАУС склаў на яго пратакол адміністрацыйнага затрымання.
Нягледзячы на тое, што журналіст прад’явіў журналісцкае пасведчанне, маёр Уладзімір Паўлаў склаў, на думку Буракова, загадзя ілжывы пратакол аб адміністрацыйным правапарушэнні па артыкуле 23.34 (Удзел у несанкцыянаваным масавым мерапрыемстве). Гэта было зроблена ў парушэнне артыкула 198 КК «Перашкаджэнне законнай прафесійнай дзейнасці журналіста».
Пазней высветлілася, што ў матэрыялах справы маецца пратакол апытання ужо ў якасці сведкі таго маёра Башарымава, дзе той растлумачыў, што апазнаў Аляксандра Буракова, так як яго ведае. У адказ Буракоў і вырашыў звярнуцца ў пракуратуру – ён ніколі з Паўлам Башарымавым знаёмы не быў, нідзе з ім не перасякаўся і кантактаў не шукаў.
Журналіст просіць пракуратуру праверыць, ці не парушыў маёр Башарымаў артыкул 179 Крымінальнага кодэкса, які называецца «Незаконнае збіранне альбо распаўсюджванне інфармацыі аб прыватным жыцці». Бо атрымліваецца, Башарымаў таемна вядзе сачэнне за ім і, як аказалася, за членамі яго сям’і.
Журналіст падазрае, што такім чынам фабрыкуюцца матэрыялы палітычна матываваных спраў, каб міліцыянту прасоўвацца па кар’ернай лесвіцы.
У дадзены момант Аляксандр Буракоў рыхтуе скаргу пракурору вобласці.
