Станіслаў Леўчанка дадаў у кейс «Вячэрняга Магілёва» новае судовае разбіральніцтва.
15 лістапада. Магілёў. Ігар Лазоўскі
Вясной 2019 года Рэспубліканская экспертная камісія па ацэнцы інфармацыйнай прадукцыі на прадмет наяўнасці ў ёй прыкмет праявы экстрэмізму вынесла рашэнне па скарзе ЛГБТ-актывіста Валянціна Цішко на газету «Вячэрні Магілёў».
Згодна з пазіцыяй камісіі, у двух матэрыялах выдання – «Лірычных пачуццяў нацягнутыя струны» і «У што выліваецца нецярпімасць да вычварэнцаў» – былі знойдзены прыкметы экстрэмісцкіх выказванняў. На газету завялі справу аб адміністрацыйным парушэнні, якую пазней перадалі ў суд Ленінскага раёна Магілёва.
Каб апярэдзіць штраф ад магілёўскага суда, газета «Вячэрні Магілёў» 6 жніўня абскардзіла рашэнне самой экспертнай камісіі ў эканамічным судзе Менску.
Юрыст «Вячэрняга Магілёва» Станіслаў Леўчанка спрабаваў даказаць, што ў матэрыялах ніякага экстрэмізму няма, а экспертная камісія правяла праверку няякасна.
Пры гэтым падчас свайго выступу юрыст назваў ЛГБТ-актывіста Валянціна Цішко «актыўным педэраст», на што суддзя зрабіла яму рэзкую заўвагу.
Цішко адрэагаваў на абразу скаргай ва УУС Першамайскага раёна Мінска. Міліцыя пачала праверку па скарзе ЛГБТ-актывіста. Для пачатку супрацоўнікі МУС хацелі атрымаць тлумачэнні самога Станіслава Леўчанкі, але той ад дачы якіх-небудзь тлумачэнняў адмовіўся.
Таксама міліцыя запрасіла лінгвістычную экспертызу, каб праверыць, ці ёсць негатыўная ацэнка ў слове «педэраст» ў дачыненні да Валянціна Цішко. Экспертная камісія пацвердзіла абразлівы характар слоў Станіслава Леўчанкі.
УУС Першамайскага раёна г. Мінска прыйшоў да высновы, што ў дзеяннях юрыста «Вячэрняга Магілёва» сапраўды ёсць склад крымінальнага злачынства па арт. 189 КК РБ «Абраза».
Міліцыя патлумачыла Валянціну Цішко, што па гэтаму артыкулу прадугледжана прыватнае абвінавачанне – ЛГБТ-актывіст павінен сам падаць на Леўчанку ў суд.
Цішко заявіў, што накіруе заяву аб прыцягненні Леўчанкі да крымінальнай адказнасці ў суд, а таксама распавёў, што будзе патрабаваць кампенсацыю маральнай шкоды.
Пры гэтым судовы працэс па справе «Вячэрняга Магілёва» да гэтага часу не скончаны. На дадзены момант матэрыялы газеты праходзяць лінгвістычны аналіз ва Упраўленні Дзяржаўнага камітэта судовых экспертыз Рэспублікі Беларусь па Магілёўскай вобласці.
