Падаецца, ў Магілёве з’явіўся з’явіўся гарадскі паляўнічы, які вершыць самасуд над людзьмі. Ці стане Мікіта Варажбітаў мясцовым «Цясаком»?

Хэллоў, XXI стагоддзе.

24 жніўня. Магілёў. Саша Мінько

Увага! Пры выкарыстанні або перадруку дадзенага матэрыялу ў іншых інтэрнэт-крыніцах, згадванне сайта mspring.online з гіперспасылкай на арыгінальны тэкст абавязкова ў першым абзацы!


Магілёўскі блогер Мікіта Варажбітаў разам з паплечнікамі выклаў на Youtube ролік «Рэйд на прастытутак. Замес з сутэнёрамі», у якім дужыя хлопцы бяруць у аблогу жанчын лёгкіх паводзін, а потым збіваюць сутэнёра. Відэа падхапілі беларускія СМІ. Што вядома пра Мікіту Варажбітава?

Часопіс аб правах чалавека MSPRING.ONLINE вырашыў пакапацца ў мінулым новага магілёўскага героя. Аказалася, што 25-гадовы Мікіта Варажбітаў доўгі час з’яўляўся байцом клуба змешаных адзінаборстваў (ММА) «Максімус Магілёў». Клуб размешчаны ў завулку Мечнікава, 1, у будынку былой крамы “Паўночны” ў спальным мікрараёне недалёка ад сілікатнага завода на ўскраіне горада.

Два гады таму Мікіта сам вырашыў стаць трэнерам і арганізаваў клуб змешаных адзінаборстваў «Ратыбор». Паслужны спіс у яго ўражлівы: бронзавы прызёр чэмпіянату Беларусі па рукапашным баі, бронзавы прызёр чэмпіянату па грэплінгу, пераможца турніру па баявым самба, чэмпіён Магілёва па панкратыёну, удзельнік прафесійных камандных баёў «8Fight».

Па стане на 1 жніўня на відэа-канал блогера падпісалася больш за 100 тысяч чалавек, што для правінцыйнага Магілёва шмат. У асноўным спартсмен выкладвае відэа падрыхтоўкі да баёў. Але сярод іх сустракаюцца і вельмі неардынарныя ролікі. Напрыклад, 31 ліпеня было выкладзена відэа, на якім дадзены старт «паляванню на графітчыкаў».

Гаворка ідзе пра маладых хлопцаў, якія распісваюць вуліцы горада адрасамі телеграм-каналаў новых наркакрамаў. Камунальныя службы месяцамі не зафарбоўваюць такія надпісы, часта не разумеючы іх сутнасці. Калі ўлады ніяк не рэагуюць на выклікі часу, ім на замену прыходзіць нехта іншы – моладзь вырашаецца на відавочнае самаўпраўства.

Задачай рэйду было знайсці графіціста альбо самога закладніка наркотыкаў і «пакараць». Праўда, нягледзячы на выдатную фізічную форму спартсменаў, дагнаць рэкламніка наркакрамы не ўдалося.

Таксама прыкметна, што Мікіта Варажбітаў выступае супраць пра-крымінальнага моладзевага руху «АУЕ» (арыштанцкага уркаганскага адзінства), але ў той жа час фатаграфуецца на фоне лічбаў «13-12», якія азначаюць абрэвіятуру, прызнаную на тэрыторыі Рэспублікі Беларусь экстрэмісцкай. Акрамя таго, у яго роліках прысутнічае неапраўдана вялікая колькасць ненарматыўнай лексікі.

Пасля апошняга роліка Мікіты Варажбітава магілёўцы даведаліся, што мясцовыя прастытуткі па-ранейшаму «працуюць» каля гасцініцы «Магілёў», і ў іх па-ранейшаму ёсць сутэнёры, а прадстаўнікі міліцыі (на слэнгу гэтых жанчын – «паліцыя нораваў») іх не чапаюць.

Стварэнне маладымі хлопцамі экстрэмальнай сітуацыі выявіла класічную праблему канфлікту пакаленняў. Сутэнёры, відавочна дасведчаныя ў «блатных» паняццях, былі не падрыхтаваныя да сустрэчы з групай, гатовай ўступаць у супрацьстаянне з-за нейкіх сваіх перакананняў.

Канфлікт скончыўся збіццём фізічна больш моцнай моладдзю «даху» нелегальнага бізнэсу. Характэрна, што міліцыя, у выніку выкліканая жанчынамі, нічога зрабіць не змагла. З агульнай карціны, убачанай праваахоўнікамі, парушэнняў заканадаўства выяўлена не было. Цяпер група прыкладна з шасці-сямі чалавек пад кіраўніцтвам блогера абяцае рабіць падобныя рэйды кожныя выхадныя.

Раней (перыяд 2011-2015 гадоў) Мікіта Варажбітаў быў лідэрам магілёўскай каляфутбольнай (футбольныя хуліганы) групоўкі «Сям’я», пазней разбітай УБАЗ-ам. Хлопцы займаліся масавымі бойкамі. Некаторыя ўдзельнікі некалі адной з наймацнейшых груповак краіны нават адседзелі рэальныя тэрміны.

Сёння частка відэа-саветаў блогера тычыцца метадаў выжывання ў вулічнай бойцы, што і прынесла яму папулярнасць. З пэўнага моманту ва ўсіх роліках стала з’яўляцца рэклама букмекерскай канторы, таксама ён рэкламуе крамы спартыўнай экіпіроўкі ў Расіі.

Сацыяльнай тэматыкай спартсмен і блогер заняўся каля двух месяцаў таму. І ў гэтым сваімі дзеяннямі ён вельмі нагадвае Максіма «Цясака» Марцінкевіча – расійскага відэаблогера-скінхэда з беларускімі каранямі, які таксама аб’яўляў «паляванне» на педафілаў і наркагандляроў. У 2017 годзе Максім Марцінкевіч быў асуджаны на 10 гадоў пазбаўлення волі за напад як раз на гандляроў наркотыкамі (адзін з пацярпелых памёр).

Адзначым, што ў адрозненне ад «Цясака», Мікіта Варажбітаў не прытрымліваецца фашысцкіх перакананняў і адкрыта прызнае, што знаходзіцца пад пільным кантролем супрацоўнікаў магілёўскага ГУБАЗ. Тым не менш, метады яго працы выклікаюць сумневы ў іх законнасці.