У Быхаве прайшоў трэнінг для сябраў участковых камісій па выбарах прэзідэнта. Фота – толькі са спіны.
Трэнінг прайшоў на базе выбарчага ўчастка №9 у Быхаве. Да сябраў камісій (усяго іх 36 з колькасцю ад 7 да 11 чалавек) была даведзена інфармацыя з метадычных матэрыялаў, зацверджаных ЦВК. Падчас вучобы мадэляваліся “розныя ўмовы працы камісій, у тым ліку сцэнары датэрміновага галасавання і дзень выбараў”.
Але хто менавіта праводзіў трэнінг – засталося загадкай, а журналістам мясцовай раёнкі забаранілі фатаграфаваць сябраў камісій, каб іх не апазналі – спісы трымаюцца ў сакрэце. Усе фота, апублікаваныя ў дзяржаўным выданні, зроблены толькі са спіны, як на падпольным мерапрыемстве.
Вядома толькі, што перад грамадзянамі, якія пагадзіліся стаць сябрамі камісій, выступіў са словамі на дарогу намеснік старшыні райвыканкама Віктар Агнетаў і кіраўнікі РАУС і МНС, якія будуць працаваць ва ўзмоцненым рэжыме. Сілавікоў, дарэчы, журналісты на фота на ўсялякі выпадак размылі.
