Актывісты даведаліся вельмі дзіўныя факты пра «Омск Карбон» і свабодную эканамічную зону

Тычыцца сістэмы адсочвання за выкідамі і зялёных насаджэнняў.

15 ліпеня. Магілёў. Ігар Лазоўскі

Увага! Пры перадрукоўцы гэтага матэрыяла іншымі СМІ, пазначэнне mspring.online як крыніцы з гіперспасылкай на арыгінал ў першым абзацы абавязковае!


Актывісты кампаніі «За здаровы Магілёў» высветлілі, што пры падрыхтоўцы праекта аб’яднанай санітарна-ахоўнай зоны ўчастка №4 свабоднай эканамічнай зоны «Магілёў» (менавіта там размяшчаюцца заводы «Омск Карбон Магілёў», «Кронаспан», ВМГ Індастры і іншыя) у азелянёную тэрыторыю незаконна ўключылі сельскагаспадарчыя землі. Усяго неправамерна было ўключана 45% плошчы ад усёй «зялёнай зоны».

ТРЭСКІ ЛЯЦЯЦЬ

Эка-актывісты высветлілі гэта з прадпісання пракурора Магілёўскай вобласці Чадзюка, якое было накіравана старшыні Магілёўскага аблвыканкама Леаніду Зайцу.

– Нягледзячы на ​​названае парушэнне, УЗ «Магілёўскі занальны цэнтр гігіены і эпідэміялогіі» выдаў па праекце станоўчае санітарна-гігіенічны заключэнне, – гаворыцца ў лісце пракурора.

Нагадаем, адной з прэтэнзій праціўнікаў заводаў было тое, што прамыслоўцы высеклі частку зялёных насаджэнняў. Чадзюк часткова пацвярджае гэта:

– За перыяд з 2016 па 2019 год у непасрэднай блізкасці ад участку №4 СЭЗ праведзена 40 высечак … Тым самым скарачалася плошча азелянення частцы санітарна-ахоўнай зоны, – сцвярджае пракурор.

Ён адзначыў, што было праведзена недастаткова мерапрыемстваў для азелянення. Чадзюк заявіў, што спробы высадзіць новы лес былі не зусім удалыя – значная частка раслін не прыжылася.
Пракурор адным з пунктаў прапанаваў старшыні аблвыканкама “прыняць комплексныя меры па забеспячэнню азеляненнем аб’яднанай санітарна-ахоўнай зоны ўчастка №4 СЭЗ «Магілёў», разгледзець перспектывы ў яе межах дадатковых аб’ёмаў лесаахоўных насаджэнняў”.

БЕЗ МЕТАДУ І АНАЛІЗУ

Яшчэ пару цікавых фактаў эка-актывісты даведаліся з ліста Міністэрства аховы здароўя, які прыйшоў магілёўцу Леаніду Платоненку.

– Як аказваецца, методыка вызначэння сажы (чорнага вугляроду) у паветры, у Беларусі яшчэ пакуль толькі рэгіструецца. «Белгідрамет» нядаўна толькі атрымаў гэтую методыку з піцерскай геафізічнай абсерваторыі імя Вайекова, – распавёў каардынатар кампаніі «За здаровы Магілёў» Андрэй Бодзілеў. – Хоць відавочна, што яна павінна была быць атрымана і выкарыстана ўжо даўно, яшчэ ў мінулым годзе, калі запускалі «Омск Карбон».

З іншага ліста – ужо з Міністэрства прыродных рэсурсаў і аховы навакольнага асяроддзя – Бодзілеў даведаўся, што сістэму маніторынгу атмасфернага паветра, якую ўжо шмат разоў абяцалі паставіць на мяжы СЭЗ «Магілёў», плануюць увесці ў строй толькі ў красавіку 2020 года.

– Улічваючы, што «Омск Карбон» павінен запусціцца літаральна гэтай восенню, выходзіць так, што на працягу паўгады завод можа не хвалявацца аб тым, што сістэма маніторынгу нешта там выявіць, – пракаментаваў сітуацыю эка-актывіст.

Паводле яго слоў, тактыка пастаяннага ліставання з уладамі дазволіла даведацца мноства цікавай інфармацыі, прычым з афіцыйных адказаў:

– Цяпер нам застаецца толькі працаваць далей і зрабіць усё, каб мінімізаваць патэнцыйны ўрон ад прамысловых аб’ектаў у гэтым раёне, – сказаў Бодзілеў.