Што рабіць, калі у твайго сябра вынеслі дзверы, забралі тэхніку і грошы і зладзілі поўны разгром?
Ператрус – самае папулярнае слова ў беларускіх медыя апошніх дзён. Для тых, хто чакае, што да яго пастукаюцца ў дзверы, ужо створана вялікая колькасць гайдаў, як і што трэба рабіць у такіх выпадках.
Але што рабіць, калі ператрус не ў цябе, а ў твайго сваяка, сябра, таварыша, якому ты хацеў бы дапамагчы?
Псіхолаг Ірына Каліноўская на сваёй старонцы ў Facebook апублікавала кароткія парады для тых, хто хацеў бы падтрымаць чалавека, які апынуўся па той бок вынесенай дзверы. Яна абапіралася на свой асабісты вопыт.
«Нягледзячы на тое, што ў Беларусі вобшукі сталіся распаўсюджанай культурнай практыкай і лічацца найменшай з магчымых зол, гэта ўсё яшчэ стрэс, шок і траўма для пацярпелых… прабачце, бока, які абшукваюць. Можна казырыццы, выцясняць і прыкідвацца, але быць гатовым і абыякавым – не», – сцвярджае псіхолаг.
Ірына прапанавала наступны спіс опцый:
- “У мяне ёсць лішні тэлефон, ноўтбук, кампутар. Куды прывезці або можаш забраць?”
- “Магу пасядзець, пагуляць, пакарміць і наогул забраць на пару дзён дзяцей”.
- Кантакты адвакатаў – можна проста дасылаць у мэсэнджэры. Нават калі там ужо ёсць адвакаты, няма ніякай гарантыі, што праз дзень у іх не адбяруць ліцэнзію і не спатрэбяцца новыя.
- Прывезці грошы. У Рэспубліцы Беларусь лепш наяўнымі. З-за мяжы можна WU – [Western Union] або іншым пераводам. Паверце, выдаткі зараз ёсць.
- Блізкім сябрам: дапамога з уборкай пасля ператрусу. “Давай я з’езджу з табой у кватэру пасля ўсяго гэтага”.
- Блізкім сябрам: клікаць на вячэры, каву, карміць і слухаць. Мы першыя чатыры дні наогул не елі дома. Ініцыяваць падрабязны аповяд: як прыйшлі, што рабілі, што казалі, што адчувалі. Важна ў гэтым пункце ведаць меру і бачыць мяжу, за якой чалавек не гатовы раскрывацца, пераварвае знутры.
- Паведамленні накшталт “любая дапамога” асабіста мяне таксама вельмі падтрымліваюць, і я за ёй звяртаюся.
Гэтыя рэкамендацыі – з майго досведу. Калі ў вас ёсць чым яго дапоўніць, абавязкова ўнясу.
І вельмі прашу памятаць, што ўсё гэта ненармальна”, – пазначыла ў пасце Ірына Каліноўская.
