У Круглым арыштаваны адзін з самых паспяховых мясцовых прадпрымальнікаў Аляксандр Калін, а таксама экс-галоўны санітарны ўрач Аляксей Цыганаў.
Верагодна, улады помсцяць ім за грамадзянскую пазіцыю і падтрымку апазіцыйных кандыдатаў на выбарах 2020 года. Распачата крымінальная справа па «народным» артыкуле 342 КК (Арганізацыя і падрыхтоўка дзеянняў, якія груба парушаюць грамадскі парадак).
У жніўні 2020 года старшыня Круглянскага райвыканкама Сцяпан Палоннікаў склікаў праўладны мітынг, на якім публічна абразіў прадпрымальніка і галоўнага санітарнага ўрача раёна за іх грамадзянскую пазіцыю. Галоўлекара санстанцыі ён нават назваў «палітычнай прастытуткай». У адказ, ад імя прадпрымальнікаў, Аляксандр Калін з калегамі занёс у райвыканкам больш за дзесятак узнагарод, грамат і падзяк, атрыманых ад чыноўнікаў, якія кляліся раней у сяброўстве і павазе. Дыпломы яны расклалі проста на ганку райвыканкама.
Два з паловай гады ўлады ўстрымліваліся ад рэпрэсій у адносінах да прадпрымальніка. Але 27 лютага супрацоўнікі ДФР і Следчага камітэта вырашылі ўзяць Аляксандра Каліна пад варту.
Спачатку яму прад’явілі абвінавачанне ва ўхіленні ад выплаты падаткаў шляхам утойвання або заніжэння падатковай базы. А роўна праз месяц, 27 сакавіка, пракурор Круглянскага раёна Аляксандр Раманаў (прызначаны на гэтую пасаду паўгады таму) санкцыянаваў ператрусы ў Круглым ужо ў межах крымінальнай справы па абвінавачанні Аляксандра Каліна ва ўдзеле ў несанкцыянаваных масавых мерапрыемствах у Мінску ў перыяд з 16 па 23 жніўня 2020 г. гады.
Аляксандр Раманаў
Гэтую відавочна палітычную справу вядзе старэйшы следчы Круглянскага РАСК Віталь Руцкі (па выніках мінулага года атрымаў званне «лепшы следчы» за дасягненне «высокіх вынікаў»).
27 сакавіка ў межах гэтай крымінальнай справы пасля ператрусаў былі папярэдне ўзятыя пад варту на 72 гадзіны жыхары Круглага Аліна Горава, Улад Лагуценка і экс-галоўлекар санстанцыі Аляксей Цыганаў. Сваякоў прадпрымальніка Аляксандра Каліна па чарзе “прэсуюць” – дачку і сына кідалі на “суткі” ў ІЧУ, а 29 сакавіка ператрусы прайшлі ў бацькі і жонкі Аляксандра Каліна.
