Міліцыя ў Магілёве папярэджвае аб адказнасці за ўдзел у несанкцыянаваных масавых мерапрыемствах не толькі навучэнцаў каледжаў і ліцэяў, але і выкладчыкаў.
Мы ўжо паведамлялі, што ў актавай зале Магілёўскага сацыяльна-гуманітарнага каледжа пры Магілёўскім дзяржаўным універсітэце імя А.А.Куляшова навучэнцы гэтай установы былі сабраныя для прафілактычнай сустрэчы з інспектарам ІДН. Мерапрыемства, прымеркаванае да прэзідэнцкіх выбараў, прайшло 11 студзеня. Падлеткаў папярэдзілі аб крымінальнай і адміністрацыйнай адказнасці за ўдзел у масавых мерапрыемствах і за злачынствы “экстрэмісцкага характару”.
Як аказалася, у той жа дзень у Магілёўскім дзяржаўным электратэхнічным каледжы прайшло такое мерапрыемства, але яно ўжо было адрасавана педагогам. Аб адказнасці за “палітычныя злачынствы” перад супрацоўнікамі каледжа выступіў інспектар ІДН Ленінскага РУУС Магілёва маёр міліцыі Уладзімір Калеснёў.
Акрамя таго, паводле інфармацыі MSPRING.MEDIA, у канцы снежня маёр Калеснёў праводзіў агульнашкольныя бацькоўскія сходы па выніках другой вучэбнай чвэрці. Тэмай бацькоўскага сходу сталі выбары прэзідэнта і адказнасць. Як мінімум, мы знайшлі пацверджанне гэтай інфармацыі ў СШ №27 Магілёва. Там 28 снежня на сустрэчы з бацькамі акрамя інспектара ІДН выступалі таксама супрацоўнікі Следчага камітэта.
