Магілёўская міліцыя тры дні трымала ў зняволенні невінаватага. Суд гэта прызнаў

Ігар Шчамялёў апынуўся адзіным пацярпелым па «Кейс Ціханоўскі», каго міліцыя не змагла схаваць пад арышт на доўгія «суткі».

29 траўня. Магілёў. Алесь Святліцкі / фота – belsat.eu


Суд Кастрычніцкага раёна 29 траўня завяршыў працэс па апошнім рэпрэсаваным міліцыяй за «кейс Ціханоўскага» магілёўцу. Суддзя Жанна Пушкіна прыйшла да высновы, што супрацоўнікі Кастрычніцкага РАУС не змаглі сабраць доказаў віны Ігара Шчамялёва ў тым, што ён нібыта ўдзельнічаў у «несанкцыянаваным масавым мерапрыемстве» 5 траўня на Віцебскім праспекце.

Нагадаем, што 5 траўня каманда блогера Сяргея Ціханоўскага павінна была сустрэцца з падпісантамі Youtube-канала «Краіна для жыцця», аднак групу іх аўтамабіляў спынілі супрацоўнікі ДАІ. Адразу пасля гэтага больш за сотню магілёўцаў прыехалі на месца інцыдэнту і здолелі адбіць ад затрымання частку каманды Ціханоўскага.

Пасля гэтага магілёўская міліцыя вырашыла адпомсціць – амаль два дзясяткі гараджан былі адпраўленыя пад арышт за нібыта незаконны мітынг.

Сярод рэпрэсаваных апынуўся Ігар Шчамялёў. 7 траўня да яго заявіліся супрацоўнікі міліцыі, аднак яму ўдалося даказаць ім, што яго не было на месцы падзей. Яго часова адпусцілі, але ўжо ў пятніцу, 8 траўня, зноў затрымалі і адправілі да суда на трое сутак у ізалятар часовага ўтрымання.

Пасля двух судовых паседжанняў у сярэдзіне траўня высветлілася, што Шчамялёў падчас разборак на Віцебскім праспекце знаходзіўся дома, а адзіны доказ яго віны – гэта відэа, на якім, як аказалася, прысутнічаў іншы чалавек, падобны на Шчамялёва.

У працэсе абвясцілі перапынак, каб запытаць дадзеныя мабільных аператараў, якія б даказвалі месцазнаходжанне Шчамялёва. 29 мая тыя пацвердзілі, што месцазнаходжанне смартфона Ігара Шчамялёва, а таксама яго жонкі і сябра, з якімі ён знаходзіўся разам 5 траўня, былі вельмі далёка ад Віцебскага праспекта.

Акрамя таго, сведкі-міліцыянты таксама выказалі сумнеў, што на відэа зняты менавіта Шчамялёў.

ХЭПІ ЭНД? НЕ

Нягледзячы на ​​тое, што Шчамялёў меў рацыю, яму ніхто не верне 3 сутак яго жыцця, якія мужчыне давялося правесці ў ІЧУ ў якасці затрыманага. Суддзя Жанна Пушкіна спыніла адміністрацыйны працэс у дачыненні да магілёўца з-за «недаказанасці вінаватасці фізічнай асобы, у адносінах да якой вядзецца адміністрацыйны працэс, у здзяйсненні адміністрацыйнага правапарушэння» (ч. 10 арт. 9.6 ПВКаАП).

Праваабаронца «Магілёўскай вясны» Барыс Бухель лічыць, што такім чынам суддзя знайшла лазейку, каб выгарадзіць супрацоўнікаў міліцыі.

– Трэба размяжоўваць «недаказанасць» і адсутнасць правапарушэння ў прынцыпе. Шчамялёву нічога нельга прад’явіць, таму што яго там нават не было. Замест часткі 10 Пушкіна абавязана была ставіць частку 1 – «адсутнасць падзеі правапарушэння». Паміж гэтымі двума часткамі ёсць вялікая розніца, – заявіў праваабаронца.

Паводле яго слоў, суддзя ўжыла “нерэабілітуючую” частку артыкула – па ёй Шчамялёў пазбаўляецца магчымасці запатрабаваць ад МУС кампенсацыі за неправамернае ўтрыманне ў ІЧУ. Калі б Пушкіна абвясціла аб адсутнасці падзеі правапарушэння, Шчамялёў быў бы ў праве разлічваць на «няўстойку» ад дзяржавы, кажа праваабаронца.