Чыноўнікі-эколагі заказалі тэлепраграму. 10-хвілінны ролік будзе каштаваць абласному бюджэту 1,5 тыс. даляраў

Пры гэтым на Youtube выпускі вельмі рэдка збіраюць больш за 250 праглядаў.

10 красавіка. Магілёў. Алесь Святліцкі


Магілёўскі абласны камітэт прыродных рэсурсаў і аховы навакольнага асяроддзя размясціў заяву на стварэнне 10 выпускаў экалагічнай тэлеперадачы «Зялёная карта».

Раней праграма з такой назвай ужо выходзіла ў эфіры тэлеканала «Беларусь-4».

Хранаметраж кожнага з дзесяці выпускаў, на замову чыноўнікаў, не павінен перавышаць дзесяці хвілін. Фармат тэлевізійнага прадукту – інфармацыйная тэлеперадача на экалагічную тэматыку.

Цікава, што ў пункце «мэтавая аўдыторыя» прадстаўнікі камітэта напісалі «шырокая».

«Тэлеперадача павінна асвятляць пытанні аховы навакольнага асяроддзя і рацыянальнага выкарыстання прыродных рэсурсаў, інфармаваць насельніцтва пра стан навакольнага асяроддзя і меры па яе паляпшэнні, фармаваць экалагічную культуру насельніцтва», – пазначана ў апісанні заявы.

Службоўцы гатовы шчодра  заплаціць з абласнога бюджэту: прыблізны кошт закупу – 29 800 рублёў за дзесяць ролікаў.

Інакш кажучы, стварэнне і трансляцыя аднаго дзесяціхвіліннага роліка пра экалогію абыдзецца дзяржаве ў сярэднім у 2980 BYN – ці каля 1,5 тыс. даляраў.

Не сказаць, што «Зялёная карта» – феерычная праграма. Магчыма, перад экранамі тэлевізараў яна збірае сотні тысяч чалавек, але ў Youtube поспехі крайне сціплыя – колькасць праглядаў рэдка перавальвае за 250.