«Омск Карбон Магілёў» абвясціў пра намер яшчэ больш павялічыць магутнасць вытворчасці

Прызначаны грамадскія абмеркаванні.

22 красавіка. Магілёў. Алесь Святліцкі. Фота аўтара

Увага! Пры перадрукоўцы гэтага матэрыяла іншымі СМІ, пазначэнне mspring.online як крыніцы з гіперспасылкай на арыгінал ў першым абзацы абавязковае!


Аб’ява пра пачатак грамадскіх абмеркаванняў была апублікавана ў абласной газеце «Магілёўскія ведамасці» за 12 красавіка.

ЗТАА «Омск Карбон Магілёў» мае намер павялічыць магутнасці раней запраектаваных усталёвак вытворчасці тэхнічнага вугляроду № 3 і № 4. Пасля рэалізацыі праектных рашэнняў агульная магутнасць вытворчасці складзе 200 тыс. тон/год. Раней гэту лічбу ўжо анансавалі прадстаўнікі прадпрыемства праз беларускія СМІ.

З лістапада па снежань 2019 года павінна быць распрацавана праектная дакументацыя. Будаванне ўсталёвак №3 і №4 пройдзе ў 2020 годзе. Запуск, па задуме кіраўніцтва «Омск Карбон», павінен адбыцца не пазней за люты 2021 года.

«Павялічэнне магутнасці створаных вытворчасцяў будзе спрыяць выкананню праграмы сацыяльна-эканамічнага развіцця рэгіёна і вобласці», – адзначаецца ў аб’яве, – Павялічэнне магутнасці дазволіць забяспечыць працоўнымі месцамі 119 чалавек».

Тэрміны правядзення грамадскіх абмеркаванняў пра ўплыў на навакольнае асяроддзе прызначаны з 15 красавіка па 15 траўня. Нягледзячы на тое, што аб’ява была апублікавана ў абласной газеце, яна засталася практычна незаўважанай. Як адзначае каардынатар кампаніі «За здаровы Магілёў» Андрэй Бодзілеў, ён даведаўся пра грамадскія абмеркаванні толькі дзякуючы аднаму з жыхароў Вейна, які выпісвае «Магілёўскія ведамасці»:

– У інтэрнэце гэтай інфармацыі амаль няма, нават на сайце «Магілёўскіх ведамасцяў». Толькі аб’ява на сайце Магілёўскага райвыканкама, якую яшчэ трэба ўмець знайсці. Пытанне там у тым, што для правядзення сходу трэба было ў тэрмін да 26 красавіка накіраваць адпаведную заяву. Калі заявы няма – не было б і схода, – расказаў экалагічны актывіст.

За кароткі тэрмін ён разам з жыхарамі аграмястэчкаў Вейна і Навасёлкі падрыхтаваў калектыўнае і індывідуальныя заявы для правядзення сходу – сваё жаданне браць удзел у ім выказалі каля двух дзясяткаў чалавек. Адбудзецца яно 11 траўня ў актавай зале Вяйнянскага Цэнтра культуры і вольнага часу.