Выбары ў Беларусі-2019: Ігару Марзалюку вынеслі афіцыйнае папярэджанне

На дзеючага дэпутата паскардзіўся кандыдат Аляксандр Паўлаў.


17 лістапада. Магілёў. Алесь Святліцкі



Акруговая выбарчая камісія (АВК) па Магілёўскай-Ленінскай акрузе №84 16 лістапада вынесла афіцыйнае папярэджанне кандыдату ў дэпутаты Ігару Марзалюку.

Іншы кандыдат па гэтай акрузе, Аляксандр Паўлаў, паскардзіўся ў выбаркам на тое, што Марзалюк падчас сустрэч з выбаршчыкамі 6 лістапада ў сярэдняй школе №35 і 7 лістапада ў гімнастычнай зале «Багіма» выкарыстаў стэнд з улёткамі і фота без зыходных дадзеных. Ён прадставіў у выбаркам адпаведныя фота.

Па словах намесніка старшыні АВК Таццяны Грышанавай, дырэктар сярэдняй школы №35 пацвердзіў, што на стэндзе ў актавай зале падчас выступу Марзалюка былі размешчаныя партрэт і біяграфічныя дадзеныя, неўзгодненыя з акруговай камісіяй. На друкаванай прадукцыі сапраўды не было выходных дадзеных.

Адзін з чальцоў акруговай камісіі заўважыў, што Марзалюк з’яўляецца публічнай асобай і яго фота можна сустрэць усюды.

Нягледзячы на ​​гэта, Таццяна Грышанава палічыла, што скарга Паўлава абгрунтавана:

– Ігар Марзалюк абіраецца другі раз. Ён выдатна разумее, што і як ён робіць, – заўважыла намеснік старшыні выбаркама.

У выніку выбарчая камісія прыняла рашэнне вынесці афіцыйнае папярэджанне кандыдату Ігару Марзалюку. Калі б ён атрымаў другое – яго маглі б зняць з выбараў.