«Я раскайваюся ў сваім учынку». Магілёўцы адклікаюць свае подпісы ў падтрымку Лукашэнкі ФОТАФАКТ

Яны прызналіся, што іх прымусілі падпісацца за дзеючага прэзідэнта.

3 чэрвеня. Магілёў. Алесь Святліцкі / photo – tass.ru


У рэдакцыю часопіса MSPRING.ONLINE даслалі асаблівыя дакументы. Гэта заявы двух жыхароў аднаго з інтэрнатаў [адрас ёсць у нашай рэдакцыі] Магілёва – Гарбузавай А.М. і Н., – паводле якіх яны вырашылі адклікаць свае подпісы за дзеючага прэзідэнта Рэспублікі Беларусь Аляксандра Лукашэнку.

Паводле абодвух, у працоўны час 26 траўня ў жыллё кожнага з іх заявіліся работнікі інтэрната з патрабаваннем паставіць подпіс за вылучэнне ў якасці кандыдата ў прэзідэнты Аляксандра Лукашэнкі.

Па словах Гарбузовай, подпісы збірала вахцёр і загадчыца інтэрната. Жанчына падпісалася за Лукашэнку, баючыся, што яе могуць выселіць з жытла раней за гэты тэрмін.

«Мне прыйшлося падпісацца. Я маці траіх дзяцей, атрымала кватэру, але пакуль пераехаць у яе не магу за кошт таго, што там вядуцца рамонтныя работы», – тлумачыць Гарбузава.

Яна шкадуе пра свой учынак і вырашыла адклікаць свой подпіс за Лукашэнку, паколькі «уся сям’я хоча жыць у цывілізаванай і нармальнай краіне, у якой улада не мае права прыгнятаць свой народ».

Падобная сітуацыя ўзнікла ў іншага жыхара інтэрната – Н.

«… Прыйшла вахцёр і патрабавала паставіць подпіс за А.Г. Лукашэнку. У вымушаным вобразе я павінен [быў] падпісацца. Я раскайваюся ў сваім учынку і прашу адклікаць свой подпіс за дадзенага кандыдата», – растлумачыў у заяве мужчына.

Свае заявы гараджане накіравалі 2 чэрвеня ў камісію па выбарах Прэзідэнта РБ Ленінскага раёна Магілёва.

Праваабаронцы «Магілёўскай вясны» звярнулі ўвагу, што гэта не першы раз, калі да іх паступае інфармацыя аб адміністрацыйным рэсурсе, які выкарыстоўвае ініцыятыўная група прэтэндэнта Аляксандра Лукашэнкі для збору подпісаў за яго вылучэнне кандыдатам.