Аляксандр Хамратаў папрасіў Следчы камітэт распачаць крымінальную справу па гэтым факце.
25 верасня. Магілёў. Алесь Святліцкі
Аляксандр Хамратаў 3 верасня прыйшоў у будынак Ленінскага РАУС, каб азнаёміцца з матэрыяламі адміністрацыйнай справы пасля яго скаргі на адну з магіляўчанак.
Супрацоўнік міліцыі Цімур Пахоменка пагадзіўся паказаць патрэбныя паперы, але загадаў Хамратову пакінуць тэлефон у файе РАУС.
– На маё пярэчанне аб тым, што я хачу зняць фотакопіі, ён адказаў, што я магу іх зняць, але без фотакамеры. Па сутнасці, яго стаўленне да мяне ўяўляла сабой з’едлівасць, непавагу і форменны здзек. У канцы Пахоменка заявіў, што раз я не здаю тэлефон, то ён не дасць мне азнаёміцца з матэрыяламі справы наогул, – распавёў актывіст.
Ён абскардзіў дзеянні супрацоўніка РАУС у судзе Ленінскага раёна, дзе прызналі яго правату. Пры гэтым прадстаўнікі міліцыі заявілі, што Хамратову далі азнаёміцца з матэрыяламі справы.
– Тое, што яны хлусяць, праверыць лёгка – дастаткова выняць і праглядзець запісы камер відэаназірання з файе РАУС за 3 верасня 2019 года. Калі, вядома, яны не былі загадзя прадбачліва знішчаныя, – заявіў Хамратаў.
Згодна з законам, сцвярджае актывіст, дзяржаўныя органы, грамадскiя аб’яднаннi i службовыя асобы абавязаны даць грамадзяніну Рэспублікі Беларусь магчымасць азнаёміцца з матэрыяламі, якія закранаюць яго правы і законныя інтарэсы.
Паколькі матэрыялы адміністрацыйнай справы Хамратову не паказалі, ён звярнуўся ў Магілёўскі міжраённы аддзел Следчага камітэта з патрабаваннем распачаць крымінальную справу ў дачыненні да супрацоўніка Ленінскага РАУС Цімура Пахоменка.
