Дастойная мэта моцных і прыстойных служыцеляў закона ў гэты няпросты час, так?
1 чэрвеня. Магілёў. Алесь Святліцкі
Праваабаронца «Магілёўскай вясны» Барыс Бухель паведаміў, што на сяброўку ініцыятыўнай групы па зборы подпісаў за вылучэнне ў кандыдаты ў прэзідэнты Святланы Ціханоўскай Кацярынай Таланковай палюе міліцыя.
Раней міліцыя ўжо цікавілася Таланковай і яе мужам з-за «кейса Ціханоўскага», калі магілёўцы змаглі 5 траўня адбіць у супрацоўнікаў МУС каманду блогера Сяргея Ціханоўскага на Віцебскім праспекце. У дачыненні да Кацярыны, як і дзясяткаў іншых чалавек, было рапачата адміністрацыйная справа за нібыта «удзел у несанкцыянаваным масавым мерапрыемстве», аднак справу спынілі.
Цяпер міліцыя зноў хоча затрымаць жанчыну:
– Таланкова ўваходзіць у ініцыятыўную групу Святланы Ціханоўскай і ў ліку іншых збірала подпісы за вылучэнне апошняй. 31 траўня да яе падыходзілі члены выбаркама з рознымі пытаннямі і правяралі пасведчанні, але ім дружна і доказна патлумачылі, што подпісы збіраюць у рамках выбарчай кампаніі, і яны сышлі. Раніцай 31 траўня суседзі паведамілі Кацярыне, што ёй цікавяцца супрацоўнікі міліцыі, круцяцца ў пад’ездзе і каля дома. Яна здолела выйсці на пікет, а перад выхадам з кватэры патэлефанавала мне і папярэдзіла, што яе могуць затрымаць. Пасля заканчэння пікету суседзі паведамілі ёй, што ёю канкрэтна цікавіліся супрацоўнікі МУС, апытвалі суседзяў, дзе яна можа быць і калі вяртаецца, – распавёў Барыс Бухель.
Улічваючы, што пікеты па зборы подпісаў – гэта цалкам законнае мерапрыемства, праваабаронцы «Магілёўскай вясны» прама называюць дзеянні міліцыі палітычным ціскам на апанентаў дзеючага прэзідэнта Аляксандра Лукашэнкі.
Сітуацыя ўскладняецца тым, што Кацярына Таланкова – маці непаўнагадовых дзяцей і да гэтага часу знаходзіцца ў адпачынку па доглядзе за дзіцем. Яе пераслед МУС, мабыць, нават выходзіць за межы таго бязладдзя, якое зладзілі праваахоўнікі ў Беларусі ў адносінах да сяброў ініцыятыўнай групы Святланы Ціханоўскай і яе паплечнікаў.
