У Слаўгарадзе мясцоваму ваенна-патрыятычнаму клубу такую “гуманітарную дапамогу” аказаў гендырэктар Беларускага цэментнага завода Ігар Сяргееў.
Сябра Савета Рэспублікі Ігар Сяргееў прыехаў у сярэднюю школу №2 горада Слаўгарада ў суправаджэнні старшыні райвыканкама Андрэя Кажамякіна, а таксама начальніка аддзела адукацыі, кіраўніка ідэалагічнай работы, etc. Для высокага госця была забяспечана яўка ўсяго педагагічнага калектыву навучальнай установы.
Чыноўнікі спачатку павіншавалі кіраўніцтва школы і членаў ваенна-патрыятычнага клуба “Патрыёт” (ВПК) з Новым годам і Раством Хрыстовым, і да гэтых свят гендырэктар ААТ “БЦЗ” уручыў дзясятак малых маршавых барабанаў. Дырэктар школы Леанід Качанаў назваў падарунак “запаветным жаданнем членаў клуба”, створанага пад патранажам Слаўгарадскага РАУС.
Праўда, як аказалася, на барабанах яшчэ трэба будзе навучыцца граць, а такога педагога ў горадзе няма. Фота з мерапрыемства бутафорскае. Тым не менш дырэктар запэўніў, што ў ВПК з’явіцца цырыманіяльная група для ўрачыстых мерапрыемстваў.
