Супрацоўнік раённага аддзела ўнутраных спраў прычапіўся да «незарэгістраванага бел-чырвона-белага сцяга» і парушэння працэсу збору подпісаў.
2 кастрычніка. Магілёў. Ігар Лазоўскі
Акруговая выбарчая камісія (АВК) Магілёўскай-Цэнтральнай акругі №85 вынесла другое папярэджанне прэтэндэнту на дэпутацтва Васілю Курушыну пасля рапарту супрацоўніка Магілёўскага РАУС.
Міліцыянт заявіў, што падчас збору подпісаў за вылучэнне кандыдатам у дэпутаты Курушын здзейсніў адразу некалькі правапарушэнняў. У прыватнасці, выкарыстаў «незарэгістраваны бел-чырвона-белы сцяг», заклікаў запісвацца ў ініцыятыўную групу магчымага кандыдата ў прэзідэнты Мікалая Статкевіча, а таксама вывесіў плакат з патрабаваннем «Лукашэнка павінен сысці».
Магілёўскі РАУС накіраваў рапарт ў абласную выбарчую камісію. Аблвыбаркам загадаў разабрацца ў сітуацыі АВК.
На паседжанні 1 кастрычніка камісія прыняла рашэнне аб тым, што Курушын парушыў Выбарчы кодэкс і вынесла папярэджанне Васілю.
Для вылучэнца гэта ўжо другое папярэджанне – першае ён атрымаў каля тыдня таму прыкладна па тых жа прычынах.
Цяпер АВК мае права не рэгістраваць Курушына ў якасці кандыдата ў дэпутаты, нават калі ён збярэ патрэбную колькасць подпісаў за сваё вылучэнне.
