21 сакавіка ў Магілёве пачынаецца XV фестываль «Март-Кантакт». Гэта першы раз, калі фэст праходзіць у паўнафарматным рэжыме пасля палітычнай зачысткі ў Магілёўскім драмтэатры.
Галоўнае фота – Спектакль Львоўскага акадэмічнага духоўнага тэатра “Уваскрэсенне” “Баль генія”, Магілёў, Сакавік Кантакт, 2014 год.
Нагадаем, на працягу апошніх двух гадоў з тэатра выціскалі найбольш таленавітых і пасіянарных людзей, у тым ліку дырэктара Андрэя Новікава, пры якім фестываль Март-Кантакт і набыў статус візітнай карткі Магілёва.
На гэты раз будуць прадстаўлены спектаклі з чатырох краін – Арменіі, Малдовы, Беларусі і Расіі (для параўнання – у 2019 было 8 краін).
На сцэне Магілёўскага аблдрамтэатра пакажуць свае пастаноўкі, у тым ліку Бранскі абласны тэатр драмы і Смаленскі дзяржаўны акадэмічны тэатр. Абедзве структуры актыўна топяць за пуцінскую вайну супраць Украіны.
Смаленскі тэатр уляпіў сумна вядомую літару «Z» у малюнак профіля ва ў Вконтакте. Таксама ўстанова культуры выклала ў сацсетцы 8 сакавіка ілюстрацыю «Za мір», суправадзіўшы карцінку тэкстам «Настала #РускаяВясна», такі ж малюнак быў выкладзены 4 сакавіка, а 2 сакавіка ілюстрацыю з літарай «Z» тэатр падпісаў «Мы ганарымся Расеяй! Мы ганарымся сваёй краінай! І #СваіхНеКідаем ніколі, таму што #МыРазам!».
Бранскія калегі не адсталі – 17 сакавіка апублікавалі навіну аб тым, што «савецкі і расійскі кампазітар Аляксей Рыбнікаў падтрымаў намаганні Расіі па дэмілітарызацыі Украіны», 16 сакавіка заявілі, што «рускую культуру хочуць адмяніць», а 4 сакавіка апублікавалі відэа са словамі падтрымкі ў адрас расійскай арміі.
Ну, а асноўны ваенны чад прыйшоўся ў Бранскім тэатры драмы на 28 лютага. Ва ў “Вконтакте” быў выкладзены відэаролік, у якім акцёр тэатра Іосіф Камышаў выказаў поўную падтрымку расійскай ваеннай агрэсіі:
«Наш прэзыдэнт зноў узяў увесь удар на сябе. Я падтрымліваю Уладзіміра Уладзіміравіча Пуціна. Трэба выкарчаваць усю гэтую карычневую чуму».
Варта адзначыць, што яшчэ адзін расійскі тэатр, які выступіць на “Март-Кантакце” – “Каляда-тэатр” з Екацярынбурга – у сваіх сацсетках пазбягае тэмы вайны.
Цынізм фэсту дзівіць яшчэ больш, калі ўспомніць, што ў апошнія гады да перапынку (у 2020 году фэст не праводзіўся, у 2021 была бессэнсоўная пародыя з «тэатральнага тыдня») на «Март-Кантакце» ставілася мноства спектакляў украінскіх тэатраў. У тым ліку тых, якія зараз знаходзяцца пад абстрэламі Z-людзей.
P.S. У дзень, калі з’явілася інфармацыя, што два расейскія тэатры падтрымліваюць вайну, артысты з Малдавіі і Арменіі адмовіліся ад удзелу ў “Март-Кантакце”.
