Магілёўцы аб’ядналіся дзеля дапамогі медыкам: у горадзе востры недахоп сродкаў індывідуальнай медыцынскай абароны

Валанцёры запусцілі збор грошаў, дапамагчы можа кожны.

15 красавіка. Магілёў. Алесь Святліцкі


Магілёўскія валанцёры кампаніі BY COVID19 спрабуюць дапамагчы мясцовым установам аховы здароўя. Штодня ў чаце, куды можа ўступіць любы магілёвец, абмяркоўваюцца і вырашаюцца пытанні з недахопам жыццёва неабходных рэчаў для медыкаў, якія змагаюцца з каранавірусам.

Хтосьці шукае неабходныя прадметы на барахолках і ў крамах, нехта дапамагае набыць іх, нехта вырабляе іх уласнаручна, нехта дапамагае з дастаўкай.

У горадзе назіраецца востры недахоп сродкаў індывідуальнай абароны для медыкаў – масак, рэспіратараў, касцюмаў і іншага.

Каб дапамагчы лекарам і медсестрам, валанцёры BY COVID19 з Магілёва запусцілі кампанію па зборы грошай на платформе MolaMola.

«Цяпер самая важная задача для Магілёва – забяспечыць медперсанал асноўнымі сродкамі індывідуальнай абароны (СІА): маскі або рэспіратары, ахоўныя камбінезоны, высокія бахілы, ахоўныя экраны. Мы арганізавалі ініцыятыўную групу швачак, якія гатовыя ўзяцца за пашыў СІА. Неабходна закупіць матэрыялы (спанбонд рознай шчыльнасці для масак і камбінезонаў, шчыльную бавоўну для шматразовых бахілаў). Медыкі актыўна кансультуюць нас па матэрыялах, памерах, канструкцыях патрэбных СІА. Маскі, камбінезоны, бахілы, шчыткі будуць перададзеныя ў Магілёўскую лякарню №1, Магілёўскую абласную бальніцу, скурна-венерычны дыспансэр, паліклінікі горада і станцыі хуткай медыцынскай дапамогі», – заявілі валанцёры ў апісанні кампаніі.

На момант публікацыі было сабрана 2215 рублёў з патрэбных 10 тысяч. Валанцёры заклікаюць ахвяраваць грошы – так мы хутчэй справімся з каранавіруснай пагрозай.

ДАПАМАГЧЫ МОЖНА ТУТ

Таксама далучайцеся ў чат BY COVID19 Магілёў і даведайцеся, што вы можаце зрабіць для паляпшэння сітуацыі.