У Магілёўскай вобласці дзяржаўныя СМІ аднамомантна выдалілі інфармацыю пра важную перадвыбарчую падзею.
MSPRING.MEDIA выявіла, што сайты дзяржаўных раённых і нават абласных газет выдалілі апублікаваныя матэрыялы аб трэнінгах для сябраў участковых выбарчых камісій (УВК).
Гэта зрабілі, як мінімум, абласны холдынг «Магілёўскія ведамасці», а таксама раённыя выданні ў Чавусах, Крычаве, Быхаве, Краснаполлі, Дрыбіне і Шклове. У кэшы Google інфармацыя аб публікацыях засталася, але на саміх сайтах яны недаступныя.
Таксама інфармацыя была выдаленая з сайта Чавускага райвыканкама, а вось Быхаўскі райвыканкам пакінуў інфармацыю, але без фатаграфій.
Верагодна, менавіта фатаграфіі сябраў участковых выбарчых камісій сталі падставай для аднамомантнага і масавага выдалення матэрыялаў.
Каманда MSPRING.MEDIA таксама звярнула ўвагу на тое, што ў іншых абласцях Беларусі такіх праблем няма. Больш за тое, напрыклад, пінскі, смаргонскі і лідскі тэлеканалы зрабілі відэарэпартажы аб трэнінгах, на якіх бачныя твары членаў УВК. Выдаленне публікацый па нейкай прычыне адбылося менавіта ў Магілёўскім рэгіёне.
ШТО ТАКОЕ ТРЭНІНГ ДЛЯ ЎЧАСТКОВЫХ ВЫБАРЧЫХ КАМІСІЙ?
Гэта абавязковая падзея перад любымі выбарчымі працэсамі ў Беларусі. На трэнінгах сябрам выбарчых камісій «тлумачацца нормы выбарчага заканадаўства і правільнасць выканання выбарчых працэдур, мадэлююцца ўмовы працы ўчастковай выбарчай камісіі ў перыяд датэрміновага галасавання і ў дзень выбараў». Як правіла, прадстаўлены УВК старшынямі, іх намеснікамі і/ці сакратарамі.
У гэтым годзе ў Магілёве, як і ў папярэднія гады, трэнінг для мясцовых участковых камісій праходзіў у гімназіі №3.
Трэнінгі праходзяць па «зацверджаных ЦВК Беларусі метадычных матэрыялах, у тым ліку з выкарыстаннем навучальнага відэафільма».
