Ва ўсіх трох магілёўскіх ВНУ прайшлі агітсустрэчы з даверанай асобай Аляксандра Лукашэнкі. Іншых агітатараў не бачна.
Сустрэчы з калектывамі ўніверсітэтаў БДУТ, БРУ і МДУ імя А.А.Куляшова праводзіў першы сакратар ЦК БРСМ, ураджэнец Магілёва Аляксандр Лук’янаў, які цяпер з’яўляецца даверанай асобай кандыдата ў прэзідэнты А.Лукашэнкі. Нічога новага ён ні студэнтам, ні выкладчыкам не сказаў.
Інфармацыя, агучаная кіраўніком праўладнай арганізацыі цалкам паўтарала тэксты метадычак, з якімі ў снежні выступаў яшчэ адзін выхадзец Магілёўшчыны, дэпутат ППНС Ігар Марзалюк.
Цікава прайшла сустрэча ў Беларускім універсітэце тэхналогій (БДУТ). Туды Аляксандр Лук’янаў прыехаў у форме студатрадаўца. І якраз пра студэнцкія атрады – ці плануецца павялічэнне міжгаліновых такіх праектаў – было пытанне з залы ад студэнткі інжынерна-інавацыйнага факультэта. “Выпадкова” студэнткай аказалася Паліна Арцёмчык, фіналістка конкурсу “Міс і Містэр Студэнцтва РБ-2023”, а таксама камісар моладзевага вытворча-працоўнага праекта “Атлант 2024”.
