“Белпошта” пакуль пакіне паслугу бандэроляў, каб не пазбавіць іх асуджаных, якія адбываюць пакаранне ў калоніях.
Загадам РУП “Белпошта” ад 19.12.2024 года №1162 унесены змяненні ў тарыфы на паслугі прадпрыемства. Дрэнная навіна ў тым, што яны выраслі з 1 студзеня, а добрая – бандэролі/дробныя пакеты з кодам “VV” усё ж застануцца.
Нагадаем, апошнія паўгода сваякі асуджаных сутыкаліся з тым, што бандэролі аўтаматычна афармляліся паштовымі работнікамі, як пасылкі, і гэта выходзіла танней для адпраўшчыка. А ў месцах пазбаўлення волі паміж рэжымнай пасылкай (як правіла, раз на тры месяцы) у 50 кг і рэжымнай бандэроллю вагой да 2 кг вялікая розніца. У некаторых выпадках адміністрацыя калоніі залічвала бандэроль за 50-кілаграмовую пасылку. Такім чынам асуджаны на некалькі месяцаў мог быць пазбаўлены прадуктаў харчавання, дасланых сваякамі.
“Белпошта” пастаянна ўдасканальвае свае паслугі і пераймае еўрапейскія практыкі, дзе бандэроль страціла актуальнасць. Тым не менш, беларуская пенітэнцыярная сістэма ўнесла ў планы аператара паштовых паслуг свае карэктывы.
Аднак зараз сваякі асуджаных павінны кожны раз папярэджваць паштовых працаўнікоў, што адпраўленне ідзе ў папраўчую калонію і патрэбен код “VV”, а само адпраўленне афармляецца як дробны пакет з абвешчанай каштоўнасцю. Слова “бандэроль” пры гэтым пішацца ўручную на адпраўленні спецыяльна для сістэмы выканання пакаранняў пасля праведзенай нарады.
Што да падвышэння коштаў, тое яго можна ацаніць па намінале літарнай маркі “K”. Тарыф вырас з 1 руб 86 кап да 2 руб 04 кап (рост на 18 капеек). Для сваякоў асуджаных гэта другая непрыемная навіна з 1 студзеня. Адначасова выраслі кошты на паслугі пакояў працяглых спатканняў, пра што мы паведамлялі раней, і на звычайныя лісты.
