Падпісвайцеся і распавядайце сябрам – манументальная праца Сяргея Пехцерава не павінна застацца без увагі.
12 лютага. Магілёў. Алесь Святліцкі / На фота – Сяргей Пехцераў, здымак – Аляксандр Сідарэўскі, masheka.by
У мінулым годзе Сяргей Пехцераў ўжо рабіў крутую рэч – яго праект па маніторынгу чысціні паветра Pavetra.online мала таго, што запусціўся, дык яшчэ і дайшоў да фіналу конкурсу праектаў Social Weekend.
У гэты раз Сяргей закрануў не менш важную тэму. Як усе мы ведаем (а хто не ведае, можа пачытаць у нас на сайце), у Магілёве існуе толькі адно месца для санкцыянаваных масавых мерапрыемстваў – гэта стадыён па вул. Чалюскінцаў.
Горад застаецца адзіным абласным цэнтрам Беларусі з нікчэмнай колькасцю пляцовак для мірных сходаў. Нягледзячы на намаганні праваабаронцаў, Магілёўскі гарвыканкам да гэтага часу цягне час і не можа прыняць рашэнне аб павелічэнні месцаў для мітынгаў і дэманстрацый (хоць па паперах чыноўнікі нібыта і не супраць).
Пакуль праваабарончая «Магілёўская вясна» рыхтуе наступны зварот, Пехцераў вырашыў узяць сітуацыю ў свае рукі і даследаваў магчымыя пляцоўкі, дзе можна было б дазволіць правядзенне мірных сходаў. У выніку ў яго атрымаўся проста шыкоўны аналітычны тэкст – абавязкова рэкамендуем яго пачытаць 🔽🔽🔽
ДАЗВОЛЕНАЕ МЕСЦА ДЛЯ МІТЫНГАЎ І АКЦЫЙ СУПЯРЭЧЫЦЬ ЗАКОНУ?
У прыватнасці, Пехцераў звярнуў увагу на тое, што дзеючае месца для масавых мерапрыемстваў – стадыён па вул. Чалюскінцаў, – нібыта і не вельмі адпавядае нормам заканадаўства.
Уся справа ў тым, што тэрыторыя стадыёна, калі меркаваць па карце, знаходзіцца бліжэй да медустановы (паліклініка №7), чым трэба, што забаронена Законам аб масавых мерапрыемствах.
Згодна з гэтым нарматыўным дакументам, мітынгі, пікеты і іншыя сходу нельга праводзіць у межах:
- 50 м ад прыпынкаў транспарту, школ, дзіцячых садкоў, пунктаў аховы правапарадку і іншых адміністрацыйных будынкаў прыпынкаў;
- 100 м ад паліклінік і бальніцы
- 200 м ад падземных пераходаў, ТБ і радыё.
Калі паглядзець на гэтую карту, становіцца зразумела, што стадыён па вул. Чалюскінцаў трапляе ў «зону» паліклінікі №7.
Яшчэ раней пра гэта заявіў твітаранін @Czah_U (за што яму ад рэдакцыі нашага часопіса асобны рэспект).
Гэта не мае розніцы, у пастанове выканкама напісана “стадыён”. Стадыён (у межах пакрыцця бегавой дарожкі) размешчаны бліжэй за ўстаноўленую законам мінімальную адлегласць — значыць гэтая пляцоўка не пасуе пад масавыя мерапрыемствы
— ČUBAKA (@Czah_U) December 4, 2019
ЯКІЯ МЕСЦЫ ПАДЫХОДЗЯЦЬ І ШТО З ГЭТЫМ РАБІЦЬ
Сяргей Пехцераў паспрабаваў вызначыць, якія пляцоўкі Магілёўскі гарвыканкам можа дазволіць пад масавыя мерапрыемствы хоць заўтра. Пры гэтым знаходзяцца яны ў цэнтры горада і адпавядаюць заканадаўству. У выніку атрымалася тры кропкі:
- Сквер 40 год Перамогі;
- Зорная плошча і Камсамольскі сквер;
- Вуліца Ленінская (участак ад вул. Болдзіна да пл.Славы) для шэсцяў і тэрыторыя плошчы Славы да мемарыяла змагарам за Савецкую ўладу.
Фактычна, Пехцераў зрабіў за чыноўнікаў ўсю працу – гарвыканкам хоць заўтра можа ўзброіцца напрацоўкамі Сяргея і змяніць уласнае рашэнне аб масавых мерапрыемствах, якое дзейнічае ажно з 2007 года.
Дапамагчы ўладам можа кожны: для гэтага дастаткова падпісаць пэтыцыю, якую падрыхтаваў Сяргей Пехцераў. Зрабіць гэта можна вось па гэтым адрасе.
Ад рэдакцыі хочам заўважыць, што права на свабоду сходаў і права на свабоднае выказванне меркавання – адны з найважнейшых, таму ў нашых інтарэсах дамагчыся таго, каб гарвыканкам усё ж такі прыняў адэкватнае рашэнне ў гэтым пытанні. Падпісвайце петыцыю і расказвайце пра яе сваім сябрам і знаёмым!
