Адстаўны палкоўнік спецназа МУС Дзмітрый Паўлічэнка адкрыта далучыўся да агітацыі за Аляксандра Лукашэнку на “выбарах”.
У Віцебскай вобласці для сустрэчы з ім збіраюць цэлыя працоўныя калектывы. Там экс-першы кіраўнік САХРу, які знаходзіцца пад санкцыямі ЕС і ЗША, распавядае пра тое, як толькі дзякуючы Лукашэнку ўдалося перамагчы злачыннасць.
⁇У Бешанковічах Дзмітрый Паўлічэнка паўстаў у ваеннай форме перад супрацоўнікамі мясцовага філіяла “Белтэлекам”, калектывам педагогаў мясцовай сярэдняй школы №2 і навучэнцамі дзвюх школ. На сустрэчу з актывам Бешанковіцкага раёна ў райвыканкаме былі сабраны больш за 200 прадстаўнікоў усіх прадпрыемстваў і арганізацый раёна.
“Трыццаць гадоў наш прэзідэнт стаіць на абароне краіны. Усе абяцанні, якія ён даваў народу ў 90-я гады выкананы. Дзякуючы намаганням Аляксандра Рыгоравіча мы жывем у міры і згодзе, і гэта трэба шанаваць”, – заявіў Зміцер Паўлічэнка.
Нагадаем, у біяграфіі адстаўнога палкоўніка напісана, што 23 лістапада 2000 года ён быў арыштаваны па загадзе кіраўніка КДБ Уладзіміра Мацкевіча па падазрэнні ў арганізацыі забойстваў, але быў вызвалены на загад Аляксандра Лукашэнкі, а 27 лістапада таго ж года былі звольненыя Уладзімір Мацкевіч і генпракурор Алег Бажэлка. Выйшаўшы са следчага ізалятара, Паўлічэнка заявіў тэлежурналістам, што «гатовы выканаць любое распараджэнне прэзідэнта».
