За паўгадзіны на пікеце двое АМАПаўцаў з’явіліся толькі на хвіліну. За гэта міліцыя хоча амаль 80 рублёў.
27 жніўня. Магілёў. Алесь Святліцкі
25 жніўня на стадыёне па вуліцы Чалюскінцаў Аляксей Майсееў разам з таварышам правялі санкцыянаваны пікет супраць закона «Аб змяненні законаў па пытаннях эфектыўнага функцыянавання ваеннай арганізацыі дзяржавы».
Перад гэтым Майсееў заключыў патрэбныя дамовы на ўборку тэрыторыі, дзяжурства «хуткай дапамогі» і ахову мерапрыемства. Сачыць за грамадскім парадкам павінен быў нарад міліцыі, аднак людзі ў форме на пікеце з’явіліся толькі раз. Прыкладна праз 5 хвілін пасля пачатку мерапрыемства міма прайшлі двое супрацоўнікаў АМАП, пасля чаго яны пакінулі перыметр стадыёна.
За такую паслугу Майсееў павінен быў заплаціць 76,5 беларускіх рублёў, але хлопец не згодны з гэтым:
– Згодна з дагаворам, які мы падпісалі, выканаўца – гэта значыць УУС Магілёўскага аблвыканкама, – павінен быў даслаць сваіх супрацоўнікаў з адпаведнай экіпіроўкай і забяспечыць ахову грамадскага парадку ў месцы правядзення мерапрыемства і на прылеглай да яго тэрыторыі ў дзень і час, названыя ў дагаворы. Але з 30 хвілін пікетавання на працягу 29 хвілін у поле зроку не было ніводнага супрацоўніка міліцыі ў форме, – паведаміў арганізатар пікета.
Майсееў распавёў, што ні ў пачатку, ні ў ходзе пікетавання ніхто з супрацоўнікаў міліцыі не падышоў, не прадставіўся яму і не паведаміў, што будзе забяспечваць ахову парадку. Малады чалавек нават не ведаў, дзе знаходзіліся сілавікі, каб у выпадку чаго да іх можна было звярнуцца, калі б паўстала непрыемная або небяспечная сітуацыя.
Хлопец накіраваў ва УУС Магілёўскага аблвыканкама прэтэнзію з-за невыканання міліцыяй дамовы ў поўным аб’ёме.
– Пікет быў заяўлены на 30 хвілін. Двое супрацоўнікаў міліцыі з АМАП знаходзіліся ў месцы правядзення мерапрыемства ўсяго адну хвіліну. Такім чынам, аплаце падлягае паслуга па ахове грамадскага парадку працягласцю ў адну хвіліну – 2 рублі, 55 капеек, – распавёў хлопец.
У сваёй прэтэнзіі Аляксей Майсееў запатрабаваў знізіць суму за аплату паслуг міліцыі менавіта да гэтай лічбы.
