За тыдзень да прэзідэнцкіх “выбараў” у Магілёўскай вобласці запусцілі яшчэ адзін прапагандысцкі праект – “Моладзевы вектар Магілёўшчыны”.
Так званы “інфармацыйна-асветніцкі праект” накіраваны на лідэраў меркаванняў у асяроддзі працоўнай і навучэнскай моладзі. Актывісты праўладных арганізацый і маладыя вучоныя ў ВНУ, каб зрабіць кар’еру, абавязаны падтрымліваць курс дзяржавы.
На сустрэчы з працоўнай моладдзю Кастрычніцкага раёна горада Магілёва 16 студзеня адабраны ў прапагандысты член-карэспандэнт НАН, доктар тэхнічных навук Вячаслаў Шаршуноў заявіў, што “калі вы сталі лідэрам, то трэба ім быць да канца, а без дакладнай грамадзянскай пазіцыі не трэба брацца за гэтую працу”. Сярод іншых агітатараў – дэпутаты, кіраўнікі ячэек дзяржпрафсаюзаў, сакратары БРСМ.
У Ленінскім раёне (на фота) акцыя прайшла ў выглядзе асветніцкага квэста “Нам ёсць чым ганарыцца і што берагчы” на базе сацыяльна-гуманітарнага каледжа. Квэст быў прысвечаны дасягненням Беларусі за 30 гадоў незалежнасці і ролі А.Лукашэнкі ў гэтым.
У гэты ж дзень такое мерапрыемства прайшло ў Чэрыкаве ў выглядзе дыялогавай пляцоўкі для моладзі, якая будзе ўдзельнічаць у выбарчай кампаніі ўпершыню. Мерапрыемства назвалі “Суперпазіцыя лідэра: моладзевы погляд”. Педагог-арганізатар СШ №1, яна ж лідэр пяршоўкі БРСМ Лізавета Арлова падвяла такі вынік:
“Ажыццяўляючы свой выбар 26 студзеня, мы з вамі будзем выбіраць не проста нацыянальнага лідэра. Трэба вызначыць: мы «за» мірнае развіццё нашай Беларусі і суверэннасць, «за» бяспеку”.
Праз дзень “Суперпазіцыя лідэра” прайшла ў Бабруйску на базе аграрна-эканамічнага каледжа і Чавусах у дзіцячай школе мастацтваў. У Кіраўску правялі квэст, а Клімавічы абмежаваліся віктарынай “Малады выбаршчык”. Падобныя мерапрыемствы павінны ахапіць усе раёны вобласці да 21 студзеня.
