За жорсткае забойства настаўніцы ў Чэрыкаве суддзя Міхаіл Мельнікаў прысудзіў 19-гадовага Станіслава і 21-гадовага Ільлю Косцевых да выключнай меры пакарання.
10 студзеня. Магілёў-Чэрыкаў. Ігар Лазоўскі / фота – spring96.org
Магілёўскі абласны суд 10 студзеня на выязным пасяджэнні ў Чэрыкаве абвясціў прысуд двум мясцовым жыхарам за забойства 47-гадовай настаўніцы Наталлі Кастрыцы. Суддзя Міхаіл Мельнікаў улічыў пажаданні пракурора, якая на пасяджэнні 8 студзеня запрасіла смяротнае пакаранне, і вынес расстрэльны прысуд.
Відэа – Праваабарончы цэнтр “Вясна”
Па дадзеных следства, у Станіслава і Іллі Косцевых быў канфлікт з Наталляй Кастрыцай з-за сястры. Настаўніца паскардзілася ў міліцыю на тое, што сваячка Косцевых ня выконвае свае бацькоўскія абавязкі ў адносінах да свайго малалетняга дзіцяці. Сям’ю сястры паставілі на ўлік, як тую, што знаходзіцца ў сацыяльна небяспечным становішчы.
10 красавіка 2019 года Станіслаў і Ілля пасля сумеснага алкагольнага застолля прыйшлі разабрацца з Кострицей, якая жыла па суседству. У выніку спрэчкі, браты нанеслі больш за 100 нажавых раненняў, ад якіх жанчына памірала працяглы час.
Каб схаваць сляды злачынства, Косцевы падпалілі дом забітай. Ратавальнікі, якія прыбылі на месца выявілі, што на целе Кострыцы меліся шматлікія раненні. Братоў хутка затрымалі.
У ходзе следства і суда яны прызналі сваю віну і заявілі, што раскайваюцца ў зробленым. Нягледзячы на гэта, суддзя Міхаіл Мельнікаў прысудзіў іх да расстрэлу. Рашэнне суддзі гледачы ў зале сустрэлі апладысментамі.
Каардынатар кампаніі “Праваабаронцы супраць смяротнага пакарання” Андрэй Палуда, які прысутнічаў на працэсе, расказаў, што на прысуд паўплываў і прэзідэнт Беларусі Аляксандр Лукашэнка:
– У большай ступені вызывае расчараванне негатыўная, скажам так, рэакцыя прэзідэнта Аляксандра Лукашэнкі ў нядаўнім інтэрв’ю радыёстанцыі “Эха Масквы”. Прэзідэнт у адказ на пытанне аб ўвядзенні мараторыя на смяротнае пакаранне сфакусаваў сваю ўвагу на сітуацыі з братамі Косцевымі. Мы ўжо ведаем выпадак, калі па справе Аляксандра Грунова Гомельскі абласны суд вынес смяротны прысуд, які потым у парадку касацыі адмянілі. Але тады прэзідэнт таксама пракаментаваў негатыўна гэтую справу, пасля чаго рашэнне Вярхоўнага суда было перагледжана, і Груноў у выніку быў растраляны. Аляксандр Лукашэнка, мякка кажучы, дастаткова ўплывовы чалавек у гэтым пытанні, – цытуе Палуду spring96.org.
