Праваабаронцаў і журналістаў на сустрэчу не пусцілі.
23 траўня. Магілёў. Ігар Лазоўскі
Праваабаронца «Магілёўскай вясны» Барыс Бухель паведаміў, што ў дадзены момант (каля 16 гадзін дня) у Магілёве праходзіць сустрэча пацярпелых ад масавай аблавы цыган і прадстаўнікоў улады.
– Учора ўночы я з адным журналістам адправіўся ў мікрараён Чапаеўка па просьбе мясцовых жыхароў, папрасілі тэрмінова прыехаць. Было 10-15 чалавек. Сказалі, што да іх прыязджаў прадстаўнік мясцовых уладаў, нібыта з аблвыканкама, і прапанаваў ім сустрэчу з уладамі, каб разабрацца з пытаннем.
Праваабаронца распавёў, што сустрэчу прызначылі на палову чацвёртага. Спецыяльна для ромаў прыгналі мікрааўтобус з таніраваным шклом. Пры гэтым частка людзей адмовілася ехаць.
?
Сустрэчу вырашылі правесці ў будынку «Магілёўаблспажыўсаюза» – ён знаходзіцца паміж палітэхнічным каледжам і чыгуначным вакзалам.
Бухель паведаміў, што ад уладаў на сустрэчу прыбыў вялікі склад, у тым ліку кіраўнік Адміністрацыі прэзідэнта Наталля Качанава. Акрамя таго, тут прысутнічала вялікая колькасць міліцыі.
Зрэшты, даведацца, што адбывалася ў зале, атрымаецца толькі па заканчэнні збору – журналістаў і праваабаронцаў, як сцвярджае Барыс Бухель, ўнутр памяшкання не пусцілі:
– Не дапусцілі нават дзяржаўныя СМІ, тое ж БелТА. Як я зразумеў, пра гэта папрасіў хтосьці з цыган, магчыма барон.
Нядопуск, па словах прадстаўніка «Магілёўскай вясны», адзін з чыноўнікаў патлумачыў тым, што гэта “звычайная працоўная сустрэча”.
У дадзены момант журналісты і праваабаронцы чакаюць вынікаў перамоваў.
Будзе дапоўнена
