Як стала вядома MSPRING.MEDIA, начальнік медыцынскай часткі бабруйскай калоніі Дар’я Ласкаўнёва, верагодна, больш не працуе на ранейшым месцы.
Паводле інфармацыі крыніцы, якую пакуль не ўдалося ні пацвердзіць, ні абвергнуць, экс-начмед калоніі маёр унутранай службы Дар’я Ласкаўнёва звольнілася пасля таго, як на волю выйшаў блогер з Гродна Вадзім Ярмашук (“Vadimati”) і даў інтэрв’ю СМІ.
Блогер распавёў аб набытай у зняволенні меланоме, віну за якую ўсклаў на Ласкаўнёву.
Акрамя гэтага, па дадзеных ініцыятывы BELPOL, Ласкаўнёва Дар’я Пятроўна “ў парушэнне ўсіх нормаў не праводзіла абследавання стану здароўя палітычных зняволеных, якія маюць патрэбу ў медыцынскай дапамозе і лячэнні, тым самым дазваляючы кіраўніцтву калоніі прыцягваць палітвязняў да цяжкай фізічнай працы, а таксама змяшчаць іх у штрафны ізалятар (ШЫЗА)“.
Photo – belpol.pro
Сама Ласкаўнёва з’яўляецца ўраджэнкай Расійскай Федэрацыі, беларускае грамадзянства яна атрымала ў 2009 годзе. Ужо ў 2010 яна пачала працаваць у ПК-2. Усяго толькі за сем гадоў яна паднялася ў званні з лейтэнанта да маёра.
Вядома, што яе муж таксама служыць у сістэме ДВП Рэспублікі Беларусь, у выхаваўчай калоніі №2 (там утрымліваюцца асобы, асуджаныя да паўналецця).
