За адзін дзень зняволены магілёўскай турмы №4 атрымаў адмовы адразу ў двух судах. У другім выпадку – з асаблівым цынізмам.
8 лютага. Магілёў. Ігар Лазоўскі. Алесь Святліцкі
У дзесяць гадзін раніцы калегія па грамадскіх справах Магілёўскага абласнога суда разгледзела касацыйную скаргу Бандарэнкі на рашэнне Ленінскага раённага суда. Нагадаем, 19 снежня суддзя Тарасава пакінула ў сіле дысцыплінарнае спагнанне за адсутнасць дакладу падчас наведвання камеры супрацоўнікам турмы, а таксама за няякасна зробленыя канверты. Старшынствавала ў калегіі суддзя Ірына Маймусава, інтарэсы Бандарэнка прадстаўляў адвакат Вадзім Мушынскі:
– Я хачу звярнуць увагу на тое, што ў рашэнні раённага суда не ўтрымліваецца ніякіх высноў адносна довадаў, якія былі пазначаны ў скарзе Бандарэнкі. Толькі прадубляваныя нейкія нормы Крымінальна-выканаўчага кодэкса, прыведзены правілы распарадку турмы, пералічаныя матэрыялы справы – і ўсё, – заявіў абаронца
Мушынскі сказаў, што адміністрацыі турмы нічога не перашкаджала павесіць графік дзяжурства, як гэта зроблена ва ўсіх іншых камерах, перш чым ставіць у віну Бандарэнка адсутнасць дакладу.
– Акрамя таго, звычайна кантакт паміж зняволеным і кантралёрам адбываўся праз акенца ў дзверы, а тут супрацоўнік турмы увайшоў прама ў камеру, з-за чаго Бандарэнка разгубіўся. Звяртаю ўвагу на тое, што сам кантралёр нічога пра адсутнасць дакладу не сказаў. Толькі другі супрацоўнік, калі ўвайшоў у камеру, абвінаваціў зняволенага ў гэтым. Што тычыцца няякасных канвертаў, то там была сітуацыя, калі некалькі канвертаў проста трохі склеіліся паміж сабой. Гэта лёгка выправілі. Я лічу, у абодвух выпадках можна было абмежавацца прафілактычнай гутаркай, – выказаў свой пункт гледжання Вадзім Мушынскі.
Адвакат яшчэ раз папрасіў адмяніць рашэнне суда Ленінскага раёна, прызнаць правату Бандарэнкі і зняць дысцыплінарнае спагнанне. Нягледзячы на довады, калегія адмовіла ў задавальненні скаргі.
Па словах Мушынскага, ён разам з Бандарэнкай абскардзіць гэтае рашэнне ў старшыні Магілёўскага абласнога суда.
Наступны працэс па скарзе Андрэя Бандарэнкі адбыўся ў другой палове дня 8 лютага. Праваабаронца аспрэчваў спагнанне, якое ён атрымаў 11 студзеня за тое, што не трымаў рукі за спіной падчас знаходжання ў калідоры турмы, як патрабуе таго ўнутраны распарадак турмы. Разглядала скаргу суддзя Галіна Тарасава. На паседжанні прысутнічаў прадстаўнік Бандарэнки адвакат Вадзім Мушынскі і прадстаўнік турмы Міхаіл Кірыенка. Мушынски хадайнічаў аб дастаўцы зняволенага на працэс, аднак Тарасава адхіліла хадайніцтва.
Як вынікае з матэрыялаў справы, 4 студзеня гэтага года Бандарэнку вывелі пад канвоем у душ. Аднак з-за паднятай трывогі канвой пакінуў яго ў калідоры ў становішчы тварам да сцяны і рукамі за спіной пад наглядам дзяжурнага паставога Куракова. Недалёка у тым жа калідоры знаходзіўся іншы вязень. Ён пачаў запытвацца ў Бандарэнкі, як таго завуць і ў якой камеры ён сядзіць. У адказ Бандарэнка моўчкі сігналізаваў рукой, што не збіраецца размаўляць. Паставой Куракоў загадаў спыніць перамовы.
Міхаіл Кірыенка заявіў, што Бандарэнка павінен быў выконваць патрабаванні канваіра, стаяць да сцяны тварам і трымаць рукі за спіной. Аднак падчас размовы Бандарэнка дазволіў сабе зрабіць жэст рукой. За гэтага 11 студзеня было вынесена дысцыплінарнае спагнанне, з-за чаго зняволеннга пазбавілі адзінага ў годзе кароткатэрміновага спаткання.
Вадзім Мушынскі перадаў суду словы Бандарэнкі аб тым, што ён увесь час падвяргаецца правакацыям і размова з іншым зняволеным цалкам можа быць адной з іх:
– Трэба мець на ўвазе, што Бандарэнка адбывае свой тэрмін у адзіночнай камэры, на чым настаяў сам. Нягледзячы на гэта, адміністрацыя не агароджвае яго ад іншых вязняў. Гэта меркаванне самога Бандарэнкі.
Падчас спрэчак адвакат звярнуў увагу суда на несастыкоўка ў матэрыялах справы:
– У рапарце Куракова пазначана, што «Бандарэнка парушыў меры ізаляцыі, а менавіта перамаўляўся з асуджаным Латышавым. Мае законныя патрабаванні спыніць перамовы не выканаў, працягваў перагаворвацца, чым парушыў правілы ўнутранага распарадку ». Аналагічныя паказанні ён дае ў сваіх тлумачэннях.
А ў пастанове аб накладанні дысцыплінарнага спагнання сказана, што Бандарэнка не выканаў патрабаванні прадстаўніка адміністрацыі стаць тварам да сцяны і трымаць рукі за спіной. Але гэтых патрабаванняў да Бандарэнкі не паступала! Не рабіў такіх заўваг Куракоў. За што пакараны Бандарэнка? Вялікае пытанне. Ужо на гэтай падставе спагнанне павінна быць адменена, – сказаў Мушынскі.
Прадстаўнік турмы заявіў у адказ, што заўвагу пра рукі за спіной Бандарэнке зрабілі іншыя канваіры. На гэта адвакат працытаваў вытрымкі з дакладу прадстаўніка адміністрацыі турмы Падрабінкіна, які праводзіў праверку па інцыдэнце. Згодна з ім, Бандарэнка атрымаў спагнанне менавіта за невыкананне патрабаванняў Куракова.
– Іншых асоб у рапарце не пазначана. А Куракоў, мяркуючы па яго рапарту, ніякіх патрабаванняў пра рукі за спіной не прад’яўляў.
Галіна Тарасава выносіла рашэнне больш за паўтары гадзіны. У выніку суддзя адмовіла ў скарзе. Падчас зачытвання рашэння, яна пакінула заўвагі Вадзіма Мушынскага пра несастыкоўкі ў матэрыялах справы без каментароў.
