Актывіста і праваабаронцу Аляксандра Хамратава брутальна затрымалі 16 лістапада, а 22 лістапада ён выйшаў з ізалятара ў якасці фігуранта двух крымінальных спраў.
23 лістапада. Магілёў. Ігар Лазоўскі
Увечары 16 лістапада з’явілася інфармацыя аб тым, што быў затрыманы магілёўскі актывіст і праваабаронца Аляксандр Хамратаў. На той момант было незразумела, у якім статусе знаходзіцца Саша – меркавалася, што ён можа быць затрыманы па адміністрацыйным артыкуле.
Зрэшты, досыць хутка стала вядома, што актывіст стаў фігурантам крымінальнай справы па арт.369 КК РБ (Абраза прадстаўніка ўлады).
22 лістапада Саша выйшаў з ізалятара часовага ўтрымання, дзе ён правёў 6 сутак і распавёў падрабязнасці сваёй гісторыі.
ПАГРАЖАЛІ ЗЛАМАЦЬ ПАЛЕЦ, КАЛІ НЕ РАЗБЛАКУЕ ТЭЛЕФОН
Прыкладна ў абед 16 лістапада Хамратаў прыехаў на сваім аўтамабілі да суду Кастрычніцкага раёна. Пасля вырашэння асабістых спраў, ён ужо вяртаўся да сваёй машыны, якую пакінуў каля задняга фасаду будынка. Калі ён ужо падыходзіў да аўто, то звярнуў увагу на чорны мікрааўтобус, які стаяў прыкладна ў дзесяці метрах ад яго.
– Памятаю, адкрылася дзверы і гучна прагучала слова «працуем». Да мяне падбегла трое чалавек у зялёнай форме, у балаклавах. Я адразу прыгнуўся, каб менш прыляцела, калі б пачалі біць. У выніку мяне проста скамячылі, як ліст паперы, аднеслі ў мікрааўтобус і кінулі там на падлозе, – распавёў актывіст.
Пляцоўка, на якой затрымалі Аляксандра Хамратава
Паводле яго слоў, практычна адразу ў яго дасталі з кішэні тэлефон і ключы ад кватэры, дзе ён жыве. Ніхто з сілавікоў, па словах Аляксандра, не прадставіўся. Адзін з, як мяркуе Хамратаў, АМАПаўцаў запатрабаваў, каб актывіст разблакаваў тэлефон.
Калі ў Сашы не атрымалася з першага разу дакладна ўвесці пароль, над ім пасмяяліся, што ён хвалюецца. Пасля гэтага адзін з супрацоўнікаў неўстаноўленых структур узяў Хамратава за мезенец і прыгразіў яго зламаць, калі ў праваабаронцы не атрымаецца разблакаваць тэлефон.
Доступ да асабістай перапісцы сілавікі атрымалі.
ТАПТАННЕ ПА СЦЯГУ І ЗБІВАННІ
Пасля затрымання актывіста адразу павезлі да яго дадому на ператрус, санкцыю на які выдаў намеснік пракурора горада Аляксандр Каранькоў. У гэты момант у яго дома знаходзілася маці, якой 81 год. Ператрус быў намінальным – практычна адразу быў канфіскаваны кампутар, пасля чаго сілавікі, паводле слоў Аляксандра, проста зладзілі разгром у кватэры – даставалі скрыні са стала і вытрасала усё змесціва ўніз, пакідалі на падлогу сукенкі маці, а таксама бел-чырвона-белы сцяг, які быў у актывіста, пасля чаго дэманстратыўна тапталіся па іх.
– Я збіраў грошы ў валюце, яны канфіскавалі іх, расклалі па купюры, таксама паклалі побач затаптаны сцяг, пасля чаго сфатаграфавалі іх. Затым адзін з сілавікоў дастаў тэлефон і пачаў здымаць мяне. Папрасіў прадставіцца і спытаў, ці ёсць нейкія прэтэнзіі да майго затрымання. Відаць, хацелі, каб я на камеру сказаў, што ніякіх прэтэнзій не маю. Я адмовіўся. Пасля гэтага да мяне падышоў супрацоўнік, мабыць, АМАП і сцягнуў мае рукі сцяжкай. Вывеў мяне з хаты ў мікрааўтобус і паклаў там на падлогу, – успамінае праваабаронца.
Пасля гэтага пачалося зьбіццё. Хамратаў сказаў, што яму ў галаву прыйшло па 3-4 удары кулакамі, пасля чаго сілавік біў яго нагой па корпусе. Гэта прывяло да праблем са здароўем: Саша прызнаўся, што стаў горш бачыць на адно вока, таксама ён мяркуе, што ў яго страсенне мозгу – часам перад вачыма без усялякай прычыны пачынаюцца «белыя ўспышкі». Усе траўмы былі апісаны.
СК, ГУБАЗіК, ІЧУ
У Следчым камітэце адбыўся першы допыт. Аляксандру паведамілі, што ён праходзіць у якасці падазраванага па крымінальнай справе па арт. 369 КК РБ. Нібыта, ён адміністраваў групу Вконтакте, пад адной з публікацый якой нехта пакінуў абразлівы каментар на адрас супрацоўніка ДАІ. Хамратава як патэнцыйнага адміністратара палічылі саўдзельнікам злачынства. Яму абвясцілі, што ён на трое сутак застанецца ў ІЧУ да прад’яўлення абвінавачвання.
Пасля СК праваабаронцу адвезлі ў будынак мясцовага ўпраўлення ГУБАЗіК – двое сілавікоў, якія рабілі ператрус у кватэры актывіста, апынуліся супрацоўнікамі менавіта гэтага падраздзялення МУС.
Там яго таксама апыталі, пасля чаго адвезлі ўжо ў ІЧУ. Там Хамратаў утрымліваўся 6 сутак замест першапачатковых трох.
– Калі скончыўся тэрмін для прад’яўлення абвінавачвання, мяне выпусцілі роўна на 4 хвіліны. Пасля гэтага мяне зноў затрымалі і зноў абвясцілі падазраваным па крымінальнай справе – ужо другой. Як аказалася, другая справа таксама ўзбуджана па арт.369 КК РБ – яны нібыта знайшлі яшчэ адзін абразлівы каментар на адрас супрацоўніка міліцыі.
Ужо па выхаду на волю Хамратов даведаўся, што яго старонка Вконтакте выдаленая невядомымі, таксама, як і група, якую ён нібыта адміністраваў. Ён таксама здзівіўся, даведаўшыся, што з яго акаўнтаў у мэсэнджарах сядзеў невядомы, пакуль Аляксандр знаходзіўся ў ізаляцыі.
Па словах Сашы, ён мае намер спыніць праваабарончую дзейнасць:
– Улічваючы тое, што адбылося, я не вораг свайму здароўю.
