Здаецца, міліцыя пратрымала на ІЧУ невінаватага, ёсць новы затрыманы. Бязмежжа МУС у Магілёве 14 траўня

Суд над Ігарам Шчамялёвым перанесены на 29 траўня. Схоплены Васіль Курушын.

14 траўня. Магілёў. Алесь Святліцкі


14 траўня судзілі чарговага затрыманага па магілёўскаму «Кейсу Ціханоўскага».

Ігара Шчамялёва затрымалі яшчэ 7 траўня, аднак тады міліцыя адпусціла яго без складання адміністрацыйнага пратакола.

Але ўжо 8 траўня мужчыну затрымалі зноў і даставілі ў Кастрычніцкі РАУС. Там на яго склалі пратакол за ўдзел у «несанкцыянаваным масавым мерапрыемстве» 5 траўня на Віцебскім праспекце. І гэта пры тым, што мужчына знаходзіўся ў гэты час дома з дзецьмі ў другім канцы горада.

Яго пратрымалі да суду ў ізалятары часовага ўтрымання амаль трое сутак. Падчас суда 11 траўня на працэс нечакана не з’явіліся два сведкі міліцыянта. Суддзя Жанна Пушкіна вырашыла перапыніць працэс да 14 траўня.

14 траўня ў судзе Кастрычніцкага раёна пасяджэнне аднавілася. Тры супрацоўнікі Кастрычніцкага РАУС у якасці сведак аднагалосна заявілі, што бачылі Ігара Шчамялёва на Віцебскім праспекце 5 траўня.

У той жа час, сведка з боку Шчамялёва сцвярджаў, што Ігар у гэты час знаходзіўся дома.

Калі суддзя пачала праглядаць відэазапісы акцыі пратэсту, высветлілася, што чалавек на відэа, у якім міліцыя нібыта апазнала Шчамялёва, на яго не надта і падобны.

Пасля гэтага ўсе сьведкі-міліцыянты выказалі сумнеў, што на відэазапісе сапраўды Ігар Шчамялёў.

Затрыманы, па савеце праваабаронцы «Магілёўскай вясны» Барыса Бухеля, запытаў білінг (вызначэнне месцазнаходжання) свайго тэлефона 5 траўня, а таксама білінг тэлефонаў яго жонкі і сведкі з яго боку. Суддзя Пушкіна з хадайніцтвам пагадзілася.

Працэс павінен аднавіцца 29 траўня.

У сувязі з такім паваротам спраў, у Ігара Шчамялёва ёсць сур’ёзныя падставы патрабаваць пакарання ў дачыненні да супрацоўнікаў РАУС, якія ілжэсведчылі па ім.

МІЛІЦЫЯ ПАЛЮЕ ЗА СЛАБЫМІ

14 траўня стала вядома, што ў Кастрычніцкі РАУС быў дастаўлены пасля затрымання актывіст Васіль Курушын. Барыс Бухелю адмовіліся даваць падрабязную інфармацыю аб тым, ці сапраўды Курушын знаходзіцца там.

Мужчыне ставяць у віну ўдзел у акцыі пратэсту 5 траўня. Суд – 15 траўня.