Міліцыя падманам затрымала аднаго з самых яркіх маладых актывістаў Магілёва. Што будзе з Сяргеем Пехцеравым далей

Сяргея Пехцерава затрымалі ў будынку Ленінскага РАУС, куды ён добраахвотна як сведка з’явіўся па позве, якую падпісаў ягоны блізкі сваяк.

11 верасня. Магілёў. Ігар Лазоўскі


Вечарам 9 верасня актывіст Сяргей Пехцераў паведаміў праваабаронцам «Магілёўскай вясны», што яго позвай выклікаюць у Ленінскі РАУС на гутарку, прычым як сведку. Пры гэтым позву на імя актывіста ўручылі ягонаму блізкаму сваяку, які распісаўся за яго.

10 верасня Пехцераў з’явіўся аб 11 раніцы ў райаддзел міліцыі, адкуль на волю ў гэты дзень ужо не выйшаў.

ХТО ТАКІ СЯРГЕЙ ПЕХЦЕРАЎ?

Сяргей @colorage Пехцераў – айцішнік і адзін з самых яркіх актывістаў новай хвалі ў Магілёве. У 2019 годзе ён разам з праектам маніторынгу чысціні паветра PAVETRA.ONLINE дайшоў да фіналу рэспубліканскага конкурсу сацыяльных праектаў Social Weekend.

Вясной 2020 года Пехцераў разам з таварышам Антонам Турко запусціў яшчэ адзін праект, які выклікаў рэзананс у краіне – сайт ядома.бел. Гэта інтэрактыўная анлайн-карта ў падтрымку беларусаў, якія адважыліся на самаізаляцыю ў разгар першай хвалі эпідэміі коронавируса.

Пасля масавых поствыбарчых рэпрэсій у жніўні 2020 года Пехцераў дапамог арганізаваць валанцёрскі лагер пад ізалятарам часовага ўтрымання, дзякуючы якому змаглі атрымаць неабходную дапамогу родныя і блізкія адміністрацыйна арыштаваных.

І гэта далёка не ўсё.

ШТО З ІМ ЗДАРЫЛАСЯ 10 ВЕРАСНЯ?

Пехцераву не паведамлялі, што ў дачыненні да яго вядзецца які-небудзь адміністрацыйны працэс. Як распавёў Сяргей напярэдадні паходу ў РАУС, з ім нібыта збіраюцца толькі «пагутарыць» як са сведкай па невядомай справе, але свайго затрымання ён не выключаў.

Роўна аб 11 раніцы ён з’явіўся ў Ленінскі РАУС. Праз 50 хвілін яго жонцы патэлефанавала супрацоўніца міліцыі і паведаміла, што Пехцераў затрыманы.

З гэтага моманту ніякай інфармацыі пра актывіста ў міліцыі не паведамілі ні яго жонцы, ні сябрам. Маці Сяргея ў аператыўна-дзяжурным аддзеле ўвогуле сказалі, што «такога няма», аднак потым далі нумар намесніка начальніка аддзела аховы прафілактыкі правапарушэнняў Уладзіміра Паўлава. Праз некалькі гадзін пасля затрымання удалося высветліць, што Пехцераў усё ж знаходзіцца ў Ленінскім РАУС. На яго быў складзены пратакол за парушэнне парадку арганізацыі масавых мерапрыемстваў (ч.1 арт.23.34 КаАП).

Пры гэтым у райаддзеле міліцыі адмовіліся казаць, калі Сяргея будуць судзіць. 10 верасня яго ў суд так і не даставілі, а ў раскладзе судовых пасяджэнняў на 11 верасня яго прозвішча адсутнічае.

Зрэшты, гэта не перашкаджае супрацоўнікам міліцыі дзейнічаць па ўпадабанай манеры – прывезці актывіста ў любым момант з матэрыяламі справы, знайсці свабодную суддзю і арганізаваць судовы працэс.

Такім чынам, напрыклад, дзейнічалі ў дачыненні да актывіста і блогера Андрэя Бодзілева. Пасля затрымання на мірнай акцыі 30 жніўня, яго на наступны дзень даставілі каля чатырох гадзін дня ў суд Ленінскага раёна, дзе яму давялося чакаць цэлую гадзіну, перш чым пачаўся суд. У раскладзе прозвішча Бодзілева з’явілася толькі калі працэс ужо пачаўся. Не выключана, што па такой жа схеме ў суд прывязуць і Пехцерава.

На момант 23:30 10 верасня Сяргей ужо знаходзіўся ў ізалятары часовага ўтрымання УУС Магілёўскага аблвыканкама.

НАВОШТА МІЛІЦЫІ ПАТРЭБНЫ COLORAGE

Праваабаронца «Магілёўскай вясны» і журналіст Саша Райкан лічыць, што сілавікі спрабуюць фізічна не дапусціць найбольш яркіх актывістаў на мірныя акцыі пратэсту.

– Калі ў папярэднія тыдні мы атрымлівалі інфармацыю ў першую чаргу пра тых, каго затрымлівалі адразу пасля акцый або нават падчас іх, асабліва па будных днях, то зараз супрацоўнікі МУС дбайней «рыхтуюцца» менавіта да пратэстаў на выходных. Відавочна, Сяргей Пехцераў, як і астатнія актыўныя магілёўцы, выклікаў у іх занепакоенасць і нездаровую цікавасць, – мяркуе Райкан.

Ён выказаў здагадку, што Пехцераву прызначаць адміністрацыйны арышт у такую колькасць сутак, каб гэтыя выходныя актывіст дакладна правёў на ІЧУ. Зрэшты, большасць людзей, у тым ліку і праваабаронцы, жадаюць як мага больш мяккага пастановы суда. Таксама не выключана, што справа будзе накіраваная на дапрацоўку – апошнім часам, па словах праваабаронцы і журналіста, гэта дастаткова частая з’ява.