Ігар Барысаў накіраваў зварот магілёўскім уладам з прапановай унесці два новых месцы для масавых мерапрыемстваў.
4 траўня. Магілёў. Алесь Святліцкі / photo – imgp.by
Раней праваабаронцы дабіліся таго, што Магілёўскі гарвыканкам вырашыў разгледзець пытанне аб павялічэнні колькасці месцаў для масавых мерапрыемстваў у горадзе. На дадзены момант дыялог пакуль працягваецца і дакладна невядома, колькі новых кропак для мітынгаў і пікетаў з’явіцца ў Магілёве, але ўлады паабяцалі мінімум адну. Верагодней за ўсё, новае месца для мірных сходаў будзе ў Кастрычніцкім раёне горада.
У сваю чаргу, да кіраўніка Магілёва Уладзіміра Цумарава звярнуўся старшыня Беларускай сацыял-дэмакратычнай партыі (Грамада) Ігар Барысаў – ён папрасіў прадаставіць грамадскасці дзве новых пляцоўкі – у Падмікольскім парку і насупраць Дома культуры вобласці.
– Гарады Брэст, Віцебск і Гродна менш Магілёва, аднак маюць большую колькасць месцаў для правядзення масавых мерапрыемстваў. Акрамя таго, у кожным раёне гэтых гарадоў вызначана па аднаму такому месцы, – адзначыў Барысаў.
У Мінску, па словах палітыка, гарадскія ўлады з пачатку года павялічылі колькасць месцаў для правядзення масавых месцаў з 3 да 6 і плануюць у бліжэйшы час павялічыць іх з 6 да 9.
– Магілёў у старажытнасці быў заможным прагрэсіўным горадам, які гарантаваў свабоду і правы сваім грамадзянам. Нельга заставацца яму ў XXI стагоддзі самым кансерватыўным з абласных цэнтраў і нягнуткім у пытанні правоў магіляўчан на свабоду сходаў, – заявіў у сваім звароце старшыня БСДП (Грамада).
Зварот быў накіраваны Уладзіміру Цумареву 2 траўня.
