Станіслаў Паўлінковіч выказаў здагадку, што на яго могуць завясці крымінальную справу.
21 ліпеня. Магілёў. Алесь Светлицкий
Магілёўскі актывіст Станіслаў Паўлінковіч паведаміў MSPRING.ONLINE, што яго выклікалі ў Следчы камітэт 22 ліпеня. Следчы па тэлефоне паведаміў, што прычынай сталі выказванні актывіста на судзе 21 траўня.
Нагадаем, што 11 траўня Станіславу Паўлінковічу прысудзілі 15 сутак арышту за ўдзел у мірнай акцыі «Кармленне галубоў» на плошчы Славы 2 траўня.
Ён нават не паспеў адбыць «суткі» да канца, як прама з ІЧУ 21 траўня яго зноў адправілі ў суд. Там яго асудзілі яшчэ на 15 сутак і аштрафавалі на 1000 рублёў за непадпарадкаванне міліцыі пры затрыманні і абразу супрацоўніка органаў унутраных спраў.
Паўлінковіч распавёў, што пасля абвяшчэння рашэння ў судзе ён дазволіў сабе шэраг крытычных заўваг, у прыватнасці, фразу «Стоп таракан». Ён адзначае, што асабіста нікога не абражаў.
Днём 21 ліпеня Паўлінковічу патэлефанаваў супрацоўнік Следчага камітэта і паведаміў, што актывісту неабходна з’явіцца на апытанне:
– Следчы сказаў, што будзе апытваць з-за маіх выказванняў у судзе. Аднак што менавіта яны там ад мяне хочуць – я не ведаю, па тэлефоне мне не патлумачылі, – распавёў Паўлінковіч.
Актывіст дапускае, што апытанне – толькі фармальная падстава для яўкі ў Следчы камітэт. Ён мяркуе, што пасля размовы са следчым яго могуць адразу адправіць адбываць другія 15 сутак, якія да гэтага часу «вісяць» на ім.
Акрамя таго, ён не выключае, што ўлады па палітычных матывах паспрабуюць націснуць на яго, зрабіўшы фігурантам крымінальнай справы. Свой статус ён пакуль не ведае.
