Годны супернік расійскім фільмам.
31 студзеня. Магілёў. Ігар Лазоўскі
Магілёўскі дзяржуніверсітэт імя Аркадзя Куляшова як след падрыхтаваўся да выбараў і выпусціў матывіровачны ролік найвышэйшага ўзроўню. Ён складаецца з двух відэа.
На першым відэа на пярэднім плане – хлопец у зялёнай майцы. Як мы даведаемся далей з відэа, яго завуць Ваня. Магчыма, у яго нейкая хвароба, фобія, якая перашкаджае яму закідваць гумовыя надзьмутыя прадметы ў кольца. Яго суправаджае таямнічы голас за кадрам:
– Пададу? Не, не змагу. Пападу? Не. Не атрымаецца. Пападу? Наўрад ці.
У гэтым жа зале знаходзіцца дзяўчына, якая нецярпліва глядзіць на гадзіннік. Урэшце, яна стамляецца ад дзівацтваў хлопца і кажа яму:
– Давай, кінь ўжо!
Хлопец з цяжкасцю распазнае словы і перапытвае, што яна сказала. Яна яшчэ раз паўтарае, каб ён кінуў. Ён сябе пераадольвае. Кідае. Мяч у кольцы. Дзяўчына ў экстазе пляскае ў ладкі. Голас за кадрам кажа:
– Ваня пакінуў сумневы. Ён наважыўся. Вырашай і ты. Прыходзь на выбары 18 лютага.
*Наш іншы журналіст, Алесь Святліцкі, выказаў здагадку, што аўтар роліка хацеў сказаць, што замест бюлетэняў у выбарчыя скрыні трэба закідваць спартыўныя мячы.
На Ваню аўтары відэа не прыструньваюць коней сваёй фантазіі і працягнулі прапагандаваць сацыяльна-адказны лад жыцця. У другім роліку змяняецца лакацыя. Цяпер ужо на другім паверсе МДУ каля кабінета, які назвалі прэс-цэнтрам, шасцёра маладых людзей чамусьці просяць распісацца маладую дзяўчыну на пустых аркушах паперы. Недалёка стаіць малады чалавек па імені Міша. Усё той жа таямнічы, поўны беларускай тугі голас за кадрам пытаецца ў яго:
– Міша. Міша. Паглядзі, хто ты і хто – яна. Хіба вы пара?
У гэты час дзяўчына працягвае радавацца белым паперкамі, якія шасцёра чалавек падсоўваюць зноў і зноў. Магчыма, яна проста распісвае засохлую ручку. У нейкі момант двое хлопцаў перад ёй пляскаюць адзін аднаго па далоні. Падсунуць белы ліст незнаёмай дзяўчыне – іх мара. Голас за кадрам пачынае матываваць:
– Міша, вырашайся. Ідзі.
Міша сціскае кулакі і рухаецца наперад. Шасцёра чалавек, якія дапамагалі дзяўчыне распісваць ручку, расступаюцца. Міша прапануе распісаць яе ручку і на сваёй паперцы. Яму асабліва вязе – дзяўчына ў падзяку адорвае героя відэа пацалункам.
– Міша пакінуў сумневы. Ён наважыўся. Вырашайся і ты.
* Ідзе застаўка «Выбары 2018».
