“Мае 1-разрад ўсходніх адзінаборстваў”. У Магілёве вельмі дзіўна сфармавалі камісіі, якія арганізуюць вашы выбары

У склад участковых выбаркамаў уключылі мемных персанажаў – кагосьці абралі таму, што ён «прапагандуе здаровы лад жыцця» або «мае творчы падыход да справы».

2 кастрычніка. Магілёў. Алесь Святліцкі / На фота – жарт гумару

Увага! Пры перадрукоўцы гэтага матэрыяла іншымі СМІ, пазначэнне mspring.online як крыніцы з гіперспасылкай на арыгінал ў першым абзацы абавязковае!


Для пачатку кароткі лікбез: парламенцкія выбары, якія пройдуць 17 лістапада (і на якія большасці магілёўцаў адкрыта напляваць) кантралююцца выбарчымі камісіямі.

На чале ідзе Цэнтрвыбаркам – вы павінны памятаць гэтую абрэвіятуру хаця б таму, што яго ўзначальвае галоўны апалагет боршчаварэння ў краіне Лідзія Ярмошына.

Узровень ніжэй – Магілёўская абласная выбарчая камісія. Яна як «Тотэнхэм» – сур’ёзна да яе ставіцца складана, але на рэгіянальным узроўні менавіта яна з’яўляецца канчатковай інстанцыяй, куды могуць паскардзіцца вылучэнцы, кандыдаты ці выбаршчыкі.

Наступны ўзровень – акруговыя камісіі (АВК), якіх у Магілёве чатыры штукі, па дзве ў кожным з раёнаў горада. У асноўным усе цяжкасці арганізацыі выбараў вісяць менавіта на іх.

І самы нізавы ўзровень – участковыя выбарчыя камісіі (УВК). Калі казаць зусім проста, то гэта менавіта тыя ўсмешлівыя цёткі і дзядзькі, якіх вы бачыце ў тых памяшканнях, куды ходзіце галасаваць.

1 кастрычніка ў Магілёве як раз сфармвалі УВК. Як і заўсёды, зрабілі гэта ў адміністрацыях Ленінскага і Кастрычніцкага раёнаў.

У Ленінскім раёне Магілёва іх будзе 78. У Кастрычніцкім – 68.

У кожную з гэтых камісій кіраўніцтва Ленінскага і Кастрычніцкага раёна адабрала членаў – ад 5 да 15 чалавек у кожную. Ніхто з апазіцыянераў у склад камісій не патрапіў, усе члены – гэта ідэалагічна правільныя грамадзяне.

Як правіла, калі раённыя ўлады адбіраюць людзей у УВК, яны глядзяць на месца працы, узрост, партыйнасць і іншыя значныя аспекты жыцця.

Але ў адміністрацыі Ленінскага раёна выбралі нейкія дзіўныя характарыстыкі для ўключэння магілёўцаў ва ў УВК. Выбары ў раёне будуць арганізоўваць каларытныя персанажы, якіх адабралі на падставе наступных апісанняў:

«Мае 1-разрад ўсходніх адзінаборстваў»;

«Вядзе актыўную грамадскую дзейнасць»;

«Характарызуецца па месцы жыхарства суседзямі станоўча»;

«Прапагандуе здаровы лад жыцця»;

«Не мае досведу працы ў камісіі, але чалавек з актыўнай грамадзянскай пазіцыяй, мае задаткі лідэра»;

«Прызёр разнастайных спартакіяд»;

«Спецыяліст, добра арыентуецца ў сваёй спецыяльнасці»;

«Па месцы працы характарызуецца як спецыяліст сваёй справы»;

«Настаўнік моладзі»;

 «З’яўляецца пераможцам алімпіяд рознага ўзроўню»;

«Бухгалтар 1-й катэгорыі»;

«Настойлівыя ў дасягненні пастаўленых мэтаў»;

«Лаўрэат конкурсаў мастацкай самадзейнасці»;

«Валодае высокім культурным узроўнем»;

І мноства іншых досыць нетрывіяльных характарыстык. Усё – у розных людзей.

Якім чынам у арганізацыі выбараў можа дапамагчы разрад ва ўсходніх адзінаборствах, валоданне высокім культурным узроўнем, любоў суседзяў і прапаганда ЗЛЖ – незразумела.

Магчыма, пакуль мы жывем у 2k19, улады Ленінскага раёна ўжо разарвалі тканіну прасторы і часу і глядзяць на жыццё з будучыні, дзе галоўнае для электаральнага працэсу – уменне прапускаць скрозь сябе энергію Цы.