У сацсетках з’явілася інфармацыя аб тым, што начальства невядомага прадпрыемства прымушае работнікаў купіць білет на канцэрт Філіпа Кіркорава за 120 рублёў.
6 сакавіка. Магілёў. Алесь Святліцкі
У Instagram з’явіўся скрін перапіскі паміж двума людзьмі, у якой гаворыцца пра прымус да куплі квітка на шоў, якое адбудзецца 13 сакавіка ў Лядовым палацы Магілёва.
Фота з вольнага доступу ў сац.сеці інстаграм. pic.twitter.com/3z2c6DSwms
— Alina Skrebunova (@AlinaSkrebunova) 5 марта 2018 г.
У Twitter інфармацыю пра перапіску апублікавала фрылансер Аліна Скрэбунова.
У каментарах да скрыншота карыстальнікі апублікавалі скан ліста, як мяркуецца, намесніка старшыні гарвыканкама Алы Галушкі намесніку старшыні аблвыканкама Дзмітрыю Янкову. У тэксце чыноўніца просіць садзейнічаць у набыцці білетаў «з мэтай заахвочвання шматдзетных маці, выбітных работнікаў, прадстаўніц прыгожай паловы чалавецтва».
Во! pic.twitter.com/h1Uyr3PxIM
— Николай (@killmanInstruct) 6 марта 2018 г.
Шоў Філіпа Кіркорава праходзіць у рамках юбілейнага тура. Пры гэтым спявак актыўна ўдзельнічае ў выбарчай кампаніі прэзідэнта Расіі ў якасці даверанай асобы Ўладзіміра Пуціна. Дарэчы, калі ўлады сапраўды выкарыстоўваюць адміністрацыйны рэсурс для рэалізацыі білетаў, то гэта ўжо не першы раз – раней мы пісалі, як бюджэтнікаў заганялі на фестываль «Магутны Божа».
