Міністэрства інфармацыі выявіла экстрэмізм у газеце «Вячэрні Магілёў»

Выданню пагражае штраф да 5100 рублёў.

3 чэрвеня. Магілёў. Алесь Святліцкі


Праваабарончая ініцыятыва «Журналісты за талерантнасць» апублікавала фатаграфію адказу з Міністэрства інфармацыі па скарзе ЛГБТ-актывіста Валянціна Цішко.

Згодна з дакументам, ведамства выявіла прыкметы экстрэмізму ў двух артыкулах газеты «Вячэрні Магілёў» пад назвамі «У ва што выліваецца нецярпімасць да вычварэнцаў?» І «Судны дзень. Лірычных струнаў нацягнутыя струны». Абодва матэрыялы апублікаваныя каля двух гадоў таму і пакуль застаюцца ў адкрытым доступе на сайце.

У першым ўхваляецца збіццё гея ў Мінску ў 2016 годзе. У другім распавядаецца аб збіцці гея ў Слаўгарадзе:

«Пад усеагульныя ўхваляльныя воклічы бародку сталічнаму перцу крыху абскублі і напрыканцы далі моцнага выспятка ў зад, каб каціўся ён назад у свой гей-клуб за 270 км».

Абодва тэксты падпісаны адным імем – Аляксандр С..

Як адзначыў першы намеснік міністра інфармацыі Павел Лёгкі, рэспубліканская экспертная камісія па ацэнцы інфармацыйнай прадукцыі на прадмет наяўнасці ў ёй прыкмет праяваў экстрэмізму накіравала сваё экспертнае заключэнне ў праваахоўныя органы для вырашэння пытання аб прыцягненні газеты «Вячэрні Магілёў» да адміністрацыйнай адказнасці.

photo – j4t.by

Калі справа дойдзе да суда, рэдакцыі выдання пагражае штраф ад 50 да 200 рублёў – максімальна «Вячэрні Магілёў» можа заплаціць 5100 беларускіх рублёў.