У суботу 8 жніўня валанцёры каманды MAYDAY разаслалі лісты і паштоўкі затрыманым журналістам і праваабаронцам
Напярэдадні, 7 жніўня, Ленінскі суд Магілёва незаконна асудзіў журналістаў і праваабаронцаў Аляксандра Буракова і Сашу Райкана, актывіста Аляксандра Хамратова. Кожнаму – па 10 сутак адміністрацыйнага арышту ў ізалятары часовага ўтрымання. Таксама 10 сутак атрымаў назіральнік Андрэй Застрэлаў.
У гэты ж дзень на суткі адправілі і журналіста Уладзіміра Лапцэвіча. Ён атрымаў 12 сутак арышту, а раней, знаходзячыся ў ізалятары да суду, абвясціў галадоўку. На 7 сутак быў асуджаны актывіст Аляксандр Таланкоў.
Валанцёрская група “Магілёўскай вясны” сабрала людзей менш, чым за суткі. У выхадны дзень, з 13:00 да 16:00, людзі прыходзілі падпісваць паштоўкі і пісаць лісты ад рукі, каб выказаць салідарнасць з усімі затрыманымі. Некаторыя нават малявалі на паштоўках.
Людзі рыхтавалі лісты не толькі для затрыманых у Магілёве – пісалі і іншым палітвязням, напрыклад, Ігару Лосіку, блогеру і адміністратару телеграм-канала “Беларусь галаўнога мозгу”, які знаходзіцца ў СІЗА.
У выніку валанцёры адправілі каля 20 лістоў і паштовак.
Яшчэ адзін збор “Падпісваем паштоўкі палітвязням” каманда
MAYDAY правядзе на наступным тыдні.
У магілёўскім ІЧУ цяпер утрымліваюцца:
Аляксандр Сяргеевіч Буракоў
Аляксандр Уладзіміравіч Буракоў
Уладзімір Лапцэвіч
Аляксандр Хамратаў
Андрэй Застрэлаў
Аляксандр Таланкоў
Дзмітрый Салаўёў
Напісаць затрыманым можна па адрасе:
ІЧУ УУС Магілёўскага аблвыканкаму
вул. Крупскай, 99Б,
212011, Магілёў
